Израильдің Қатар астанасына соққысы қызу пікірталас тудырып отыр.
БҰҰ Қауіпсіздік Кеңесі шабуылды қатаң айыптағанымен, мәлімдемеде Израиль туралы ештеңе айтпады, деп хабарлайды inbusiness.kz сайты.
Құжатты барлық 15 мүше ел мақұлдаған, арасында Израильдің дәстүрлі одақтасы АҚШ та бой көрсетеді. Мәтінді Ұлыбритания мен Франция дайындағаны белгілі болды.
– Бұл соққы лаңкестер үшін қауіпсіз баспана Газада да, Тегеранда да, Дохада жоқ екенін көрсетті. Біз лаңкестік көшбасшыларына қай жерде жасырынса да қарсы әрекет етеміз, – деп ашуланды Израильдің БҰҰ-дағы елшісі Дани Данон.
Ал Қатар премьер-министрі және сыртқы істер министрі шейх Мұхаммед бен Абдулрахман әл-Тани Израильді "Газадағы соғысты аяқтау әрекетіне нұқсан келтірді" деп айыптады.
– Келіссөз кезінде біздің аумаққа жасалған шабуыл Израильдің шынайы ниетін әшкереледі. Оған Палестина халқын мәңгі қайғы-қасіреттен арылтпау маңызды, – деді ол.
Алжир өз мәлімдемесінде агрессор туралы тікелей айтылмағанына наразы.
– Зорлық-зомбылықты тоқтатпаса – өрши береді, жауапсыздық – соғыс өртін тұтатады. Халықаралық қауымдастықтың үнсіздігі хаосқа әкеледі, – деді Алжир елшісі Амар Бенджама.
Еске салайық, Израиль 9 қыркүйек күні Қатар астанасы Дохаға әуеден шабуыл жасады. Олар нысанаға палестиналық ХАМАС-тың саяси бюросының мүшелерін алғанын мәлімдеп ақталды. Соққыдан 6 адам, яғни топтың бас келіссөзшісі Халил әл-Хайидің ұлы мен Қатар Ішкі істер министрлігінің қызметкері қаза тапты.
