Күнтізбенің жаңа парағы ашылып, 31 арна күзгі телемаусымын бастайды. Бұл маусымда көрерменді өмірден алынған шынайы оқиғалар, тұсаукесерлер мен ел көкейіндегі мәселелерді көтеретін жобалар күтеді, деп хабарлайды арнаның баспасөз қызметі.
Көрермен назарына ең үздік ақпараттық бағдарлама "Информбюро", сонымен қатар Руслан Өтепбай жүргізетін "Әділдік алаңы" ток-шоуының тұсаукесері және әр түрлі жанрдағы төрт телехикая көгілдір экранға жол тартады.
"Информбюро" – 1996 жылдан бастап эфирде жұмыс істеп келе жатқан еліміздегі ең танымал ақпараттық жобалардың бірі. Жылдар бойы көрермен сенімінен шыққан бұл бағдарлама шынайы дерекке сүйеніп, объективті әрі өзекті мәселені халыққа жеткізуімен ерекшеленеді.
Күзгі телемаусымның шымылдығын айқара ашқан 31 арнаның жаңа жобасы "Әділдік алаңы" бағдарламасында — елдің елең-алаңын дөп басып, өзекті мәселе, өткір тақырыптарды талқылайды. Мұнда халықтың жанын ауыртқан жаралы тақырыптар қозғалады. Тұрмыстық зорлық-зомбылық, алаяқтықтың шырмауындағы жандар, ерекше күтімді қажет ететін балалардың мұңы – бәрі де осы алаңда сөз болып, әділдікке жол ізделеді.
"Әділдік алаңын" жай ғана ток-шоуға балау – көңілді кеміту. Бұл – әділетсіздік белең алған қоғамда әділдіктің шырағын жағып, қараңғылықты жарып шыққан үміт сәулесі. Алғашқы шығарылымдарда-ақ халықтың жүрегін селт еткізген оқиғалар көтерілді. Мәселен, күнкөріс қамымен алыстағы елде құлпынай теріп жүрген ақынның аянышты тағдыры "Өзге елде сұлтан болғанша…" бағдарламасынан кейін жұртты ойға қалдырды. Аталмыш шығарылымнан кейін тағдырлас жандар, көзі қарақты көрермен редакцияға кері байланысқа шығып, пікірін білдіруде. "Балабақшадағы сұмдық: жуындырды ма, күйдірді ме?" шығарылымы да көптің жағасын ұстатып, ел арасында үлкен толқу тудырды. Одан бөлек, "Лудомания "құмарлық құрбандары", "Ерлерге арналған тренинг: мотивация әлде манипупуляция?" сынды тақырыптар әлеуметтік желілерде жүз мыңдаған қаралым жинап, қызу талқыға түсуде. Күздің қоңыр салқынымен бірге эфирге қайта оралған Руслан Өтепбайды көрермен ыстық ықыласпен қарсы алып, сағынышын басқандай болды.
"Көпшілік "қазіргі телеарналардың қоғамға берері кем, айтар ойы әлсіз" деп сынға алады. Алайда "Әділдік алаңы" бұл пікірді жоққа шығарып, көгілдір экранның тың қырын, шынайы болмысын паш етті. Бұл – көрерменге сенім сыйлап, жүрегіне үміт ұялататын, әрбір жанға құрметпен қарай отырып, нақты көмек қолын созатын жоба. Халықтың жанайқайын жеткізіп, өмірдің өзекті мәселелерімен үндескен мұндай бағдарламалар қазір қоғам үшін ауадай қажет", — дейді телеарна баспасөз қызметінің өкілдері.
"Қалың көрерменге бағдарламаның алғашқы шығарылымы 25 тамызда жол тартқан болатын. Бірінші бөлімнен бастап-ақ халықтың ыстық ықыласына бөленді. Бағдарлама жарияланған сәттен бастап YouTube платформасы мен әлеуметтік желілерде қызу талқыланып, үлкен сұранысқа ие болды. Бұл — жай ғана ток-шоу емес, бұл — халықтың жанайқайын еститін ашық алаң. Жобаның басты мақсаты – көрерменге көмек қолын созу. Сол үшін бағдарламаға арнайы заңгерлер, дәрігерлер, психологтар қатысып, практикалық кеңестер беріп, көрермен сауалдарына жауап береді.
Әр тақырып халықтың жүрегінен орын алып отыр, мұны эфирдегі және YouTube-тағы көрсетілімдер мен әлеуметтік желілердегі пікірлерден анық байқауға болады. Бағдарламада түрлі өзекті мәселелер көтеріледі: Англияға жұмысқа барам деп алаяққа алданып қалғандар, әртүрлі секталарға кіріп кеткен адамдар, лудомания, сұлулық құрбандары, балабақшадағы жағдайлар және тағы басқа тақырыптар алдағы уақытта көрсетіледі", – дейді 31 арнаның телевизиялық өндіріс жөніндегі бас директордың орынбасары Анар Ибраева.
Ақпараттық және қоғамдық бағдарламалардан бөлек, 31 арнаның күзгі маусымы көркем шығармалардың тұсаукесерімен қуантпақ. Жаңа маусымда бірден төрт жаңа телехикая көрермен назарына ұсынылады.
Олардың бірі — эфирге 20 қыркүйекте жол тартатын террорлық актіні болдырмауға арналған он екі бөлімнен тұратын "ТОР" телехикаясы. Телехиякаяда Берік Айтжанов, Нұрлан Алимжанов, Зарина Кармен сынды халықтың сүйікті актёрлері ойнайды. Операция тобы үш террористі қолға түсіреді, олардың ішінде жасөспірім де бар. Бұл оқиға арнайы бөлім офицері үшін жеке трагедияға айналады: себебі ұсталған жасөспірім – оның ұлы, олар ажырасқаннан кейін баласымен жақын араласпаған.
Кейіпкер уақытша қызметтен шеттетіліп, өз бетімен тергеу жүргізе бастайды. Оның мақсаты — жасөспірімдерді радикалдардың ықпалынан сақтап, ұлының жолын қайталамау үшін рекрутинг желісін бұзу. Жобаның соңғы бөлімінде кәмелетке толмағандар колониясынан алынған құжаттық кадрлар көрсетіледі. Сол жерде нақты жасөспірімдер радикалдардың ықпалында қалай қалғандары туралы оқиғаларын ашық көрсетеді.
"Фаризажан" — қазақтың аңызға айналған ақын қызы Фариза Оңғарсыноваға арналған өмір жолын баяндайды. Бұл телехикая оның Атырау даласындағы балалық шағынан бастап, парламент алаңындағы күресі туралы өмір жолын, өнерін және поэзиясын көрсетеді. Оның шығармашылығы ұлттың ажырамас бөлігіне айналған. Телехикаяда сол кезеңнің көрнекті тұлғалары — Мұқағали Мақатаев, Шерхан Мұртаза, Әбіш Кекілбаев сынды мәдениет пен әдебиеттің қайраткерлерін де көре аласыздар.
"Ұшқын" драмасы бала кезден ата-анасынан айырылып, жетімдік пен ауыр сынақтардан өткен, бірақ өзіне деген сенімін сақтап қалған қос бауырдың хикаясы. Ол өскен соң ТЖ қызметінің құтқарушысы болып жұмыс істейді. 2024 жылғы су тасқыны сияқты ірі апаттарды жоюға қатысады. Алайда тағдыр оны сынауын тоқтатпайды. Кейіпкер бала кезде ата-анасынан айырған адамды құтқаруға мәжбүр болады. Бұл – төзімділік, адамгершілік құндылықтар және өшпенділік пен парыз арасындағы таңдау туралы ерекше оқиғаны баяндайтын драма.
"Әке" – 10 бөлімнен тұратын отбасылық драма. Телехикая ата-ананың ажырасуы баланың тағдырына қалай әсер ететінін шынайы түрде көрсетеді. Анасы шетелге кетіп, екі баланың барлық жауапкершілігі әкесі Берікке жүктеледі. Ол кенеттен жалғыздық, тұрақсыз жұмыс, баспана тапшылығы және күнделікті тіршіліктің таусылмас қиындықтарымен бетпе-бет келеді. Бір оқиға оны ток-шоуға баруға мәжбүр етеді. Онда жалғыз басты әкенің шынайы оқиғасы қоғамда үлкен үн туғызады. Бұл сюжет еліміздегі өзекті мәселелердің бірін – анасыз балаларды тәрбиелеп отырған 120 мыңнан астам әкенің өмірін де бейнелейді.
Күзгі маусымда 31 арнада көптеген әлемдік тұсаукесер мен отандық фильмдер көрсетілмек.
31 арна өз бағытын өзгертпейді – шындықты ашық айтып, ең үздік киноларды ұсынып, әрдайым көрерменге жақын. "Біз үшін басты құндылық – көрерменнің сенімі. Биылғы маусым ерекше болмақ: ашық әңгіме, өмірге қажет жобалар мен әр жүрекке әсер ететін оқиғаларды ұсынамыз", – дейді "31 Медиахолдингінің" бас директоры Бек Кенжебай.
Мәтіннен қате тапсаңыз, бізге жазыңыз
