Албанияда жасанды интеллект негізіндегі модель "ЖИ-министр" ретінде қолданыла бастады. Ол "Диелла" деп аталады, қазақ тілінде "Күн" деген мағынаны береді, деп хабарлайды KAZ.NUR.KZ РБК-ға сілтеме жасап.
Жасанды интеллект мемлекеттік сатып алу қызметіне жауапты болады.
Премьер-министр Эди Раманың айтуынша, "Диелла" мемлекеттік тендерлермен айналысады, ол арқылы үкімет жеке компаниялармен келісімшарт жасайды.
Осылайша мемлекеттік сатып алу қызметіндегі сыбайлас жемқорлықтың алды алынады деген болжам бар.
"ЖИ-министр" моделі ел азаматтарына түрлі қызмет алуға мүмкіндік беретін e-Albania платформасында қолданылады.
Айта кетейік, Қазақстанда жасанды интеллект министрлігі құрылады. Бұл туралы Қазақстан халқына жолдауында президент мәлімдеді.
Сондай-ақ Қасым-Жомарт Тоқаев халыққа жолдауында Қазақстанның цифрлық елге айналатынын және ЖИ-дан басқа дамудың баламасы жоқ екенін айтты. Мемлекет басшысы Қазақстанды үш жылдың ішінде цифрлық елге айналдыруды тапсырды.
Ал Цифрлық даму министрі жаңа ЖИ министрлігі қашан және қалай құрылатынын айтқан болатын.
Мәтіннен қате тапсаңыз, бізге жазыңыз
