Алматы облысы мен Мәскеу қаласы сауда-экономикалық байланыстар мен өнеркәсіптік кооперацияны кеңейтіп, цифрлық трансформацияны дамытады. Шағын және орта бизнесті де қолдауға ниетті. Осы және басқа да саладағы серіктестік Ресей астанасында өткен бизнес-форум аясында кеңінен талқыланды, деп хабарлайды 24kz.

Қазақстанның Ресейдегі Елшісі Дәурен Абаев шетелдік инвесторлар мен серіктестер үшін қазақстандық экономиканың аса тартымды негізгі салаларын атап өтті. Ол Мемлекет басшысы Қасым-Жомарт Тоқаевтың халыққа Жолдауында да ірі инвестиция тарту мәселесіне айрықша мән берілгенін айтты.

Дәурен Абаев, ҚР Ресей Федерациясындағы Төтенше және өкілетті елшісі:

- Инвестиция саласына көп көңіл бөлініп жатыр. Жыл басынан бері негізгі капиталға құйылған қаражат 16%-ке өсіп, 18 млрд доллардан асты. Қазіргі таңда еліміз қолайлы жағдай мен үлкен мүмкіндік ұсынып отыр. Бұл тиімді инвестициялар тартуға, тәжірибе алмасуға және өзара пайдалы сауданы дамытуға қолайлы алаң.

Қазақстан Мәскеудің сыртқы сауда әріптестері арасында бесінші орында. 2024 жылы тауар айналымы шамамен 9 млрд долларға жетті. Ресей астанасы шығармашылық индустрия мен жоғары технология саласында серіктестікті дамытуға мүдделі.

Сергей Черёмин, Мәскеу қаласы әкімшілігінің бөлім басшысы:

- Мәскеу – Ресейдің ішкі жалпы өнім көлемі бойынша көш бастап тұрған қала. Оның экономикасының жалпы көлемі шамамен 400 млрд АҚШ долларын құрайды. Бұл көрсеткіш орташа алғанда еуропалық мемлекеттердің деңгейімен тең. Осы әлеуетінің арқасында Мәскеу тек Орталық Ресей үшін емес, бүкіл Еуразиялық кеңістікке шығатын ірі нарыққа жол ашады.

Қазақстан тарапы қоғамдық және жол қауіпсіздігін қамтамасыз ететін IT шешімдерін, сондай-ақ Алматы облысының цифрлық егізі жобасын таныстырды. Мәскеулік стартаптарға Қонаев қаласындағы Alatau Hub мүмкіндіктері көрсетілді. Соңғы жылдары Алматы облысы инвестиция тартуда жақсы нәтижеге жетіп келеді. Өткен жылы өңірге 1 трлн 17 млрд теңге көлемінде қаражат құйылды. Сондай-ақ Алматы облысы Мәскеу агломерациясымен ынтымақтастықты дамытуды жоспарлап отыр. Ресей астанасында өткен форумда қос тарап меморандумға қол қойды. Іс-шараға екі өңірдің 100-ден астам іскерлік қауымдастық өкілдері қатысты.

Марат Сұлтанғазиев, Алматы облысының әкімі:

- Президент Жолдауында Алатауға ерекше мәртебе берді. Жақын күндері бұл мәртебені ресми түрде бекітетін жарлық қабылданады. Аталған шешім арнайы экономикалық аймақ шеңберінде ғана емес, инвесторларға қосымша жеңілдіктер беруді де көздейді. Мәскеу облысы өндірісті дамыту және кеңейту бағытында қызығушылық танытып отыр.

Форумда Алматы облысында 75 гектар аумақта агрохаб құру туралы келісімге де қол қойылды. Сонымен қатар Қазақстан, Қытай және Ресей арасындағы тағы бір бірлескен жоба – Мәскеу облысындағы Селятино кентінде орналасатын көлік-логистика хабы. Ол 2026 жылы іске қосылып, Қытайдан экспорт көлемін үш есе арттыруға мүмкіндік береді деп жоспарланып отыр.

Авторлары: Нұрбике Жігер, Дана Нұржан, Шахзод Гамиров