Ол бұл кәсіпті 10 жылдан аса уақыт бұрын туған нағашысынан үйренген екен.
Қызылордалық шебер Нұргүл Қожақова бір аяқкиімді тігуге жарты сағат уақытын арнайтынын айтады, деп хабарлайды inbusiness.kz сайты.
Етікші әйел бұл қызметке әлі де сұраныстың көп екенін жасырмады. Оның бірден-бір себебі – қазіргі аяқкиімдердің сапасыздығы. Сырдария ауданы, Нағи Ілиясов ауылының тұрғыны әсіресе қыс мезгілінде жұмысы қыза түсетінін де сөз етті.
Нұргүл Қожақова еңбек адамы ретінде ауыл әкімшілігінде қоғамдық қызмет атқарады. Ол көбіне ер адамдарға тән кәсіпке өз қызығушылығы арқылы келіпті.
– Әлбетте, бастапқыда қиындық болғаны рас. Уақыт өте келе қолдан келетін жұмыс екенін сездім. Адамға қай істе болмасын, ынта-жігер керек. Ер-азаматтардың керзі етігінен бастап, спорттық аяқкиімді тігуді әдетке айналдырғанмын. Етіктің табанын ауыстырып, жыртылған, тесілген жерін жамаймын. Мәсі мен әскери етік тігуге де машықтандым. Әуелгіде етікшілікке қызығушылықпен келдім. Жұмысымды сапалы жасауға тырысамын. Алдағы уақытта етік тігетін арнайы аппарат алу ойымда бар. Бір аяқкиімді 1500-2000 теңге аралығында тігемін, – дейді Нұргүл Малдыбайқызы.
Ол – 3 перзентті дүниеге әкелген жан. Балаларының болашағы үшін үйде жылқы, сиыр, ешкі, тауық асырап, табыс көзін еселеу үшін іс-әрекет етіп жүр.
– Ауылда тұрған соң мал асырап, бақша егу – ауыл тұрғындары үшін үйреншікті жайт. Етік тігу ісі бүгінде жаныма жақын кәсібіме айналды. Икемділіктің арқасында ел алғысын арқалап жүрмін. Біз бен ілмекті, жіпті қолыма алып, спорттық, классикалық үлгідегі аяқкиімді де тіге беремін. Еңбек ету адамның басты қағидатына айналуы керек, – дейді етікші келіншек.
