2025 жылғы 15 қыркүйек сағат 12:00-ден бастап Алматы әуежайындағы Air Astana-ның ішкі және халықаралық рейстеріне тіркеу тек Т2 терминалында жүргізіледі, деп хабарлайды KAZ.NUR.KZ әуе компанияның баспасөз қызметіне сілтеме жасап.
Air Astana өкілдерінің айтуынша, бұл өзгерістер ішкі рейстер терминалы (Т1) ғимаратындағы жөндеу жұмыстарына байланысты енгізіліп отыр және жөндеу аяқталғанға дейін жалғасады.
"Ішкі рейстерге тіркеу Т2 терминалындағы 14–25 тіркеу орындарында жүргізіледі. Тіркеуден кейін жолаушылар алдын ала тексеруден өту және ұшаққа отыру үшін Т1 терминалына баруы керек. Онлайн тіркеуден өткен жолаушылардың жүктері Т2 терминалындағы 14–15 орындарда (baggage drop-off) қабылданады. Онлайн тіркеуден өткен жүксіз жолаушылар тікелей Т1 терминалына барып, тексеруден өтіп, ұшаққа өте алады", — делінген хабарламада.
Әуе компания өкілдері онлайн тіркеу Air Astana-ның ресми сайтында және мобильді қосымшасында қолжетімді екенін еске салады. Ішкі рейстерге онлайн тіркеу ұшуға 36 сағат қалғанда ашылып, 60 минут қалғанда жабылады. Сонымен қатар Т2 терминалында өзін-өзі тіркеу киосктері орнатылған.
Air Astana жолаушыларға тіркеу уақыты мен терминалдар арасындағы өту уақытын ескеріп, әуежайға алдын ала келуді ұсынады.
Ал халықаралық рейстерге тіркеу тәртібі өзгеріссіз.
Мәтіннен қате тапсаңыз, бізге жазыңыз
