Отау құрғанына 25 жыл толған отандық әнші Роза Әлқожа дүркіретіп күміс той өткізген сәтінен видеоларды Instagram желісіндегі парақшасында бөлісті, деп хабарлайды KAZ.NUR.KZ.
"Аллаға мың да бір шүкір. Бүгін отау құрғанымызға 25 жыл. Көптен күткен тойымыз басталды. Ұлым мен қызым той төріне әндерімен алып шықты, құттықтап келген барша жандарға алғысым шексіз", -деп жазды әнші той видеоларындағы сипаттамасында.
Ұлы мен қызынан бөлек әншінің өзі де тойда жан жарына арнап ән шырқап, жаңа әнінің тұсауын кесті.
"Жан-жарыма арнап жаңа ән жаздым. "Әкемнің күйеу баласы" деген, Аллаға шүкір, тойымыздың үстінде тұсауын кестік", — деп жазды әнші парақшасында.
Той қонақтарына ән шашудан бөлек, алып торт ұсынылды.
Әнші күміс тойына отандық дизайнер Аида Қауменова тіккен ретрокөйлекті киіп шықты.
"Күйеуіме қайтадан тұрмысқа шығамын" деген сұлу да талантты Розаның идеясын біз жүзеге асырдық. Роза жолдасының 45 жас мерейтойына тосынсый жасағысы келген соң шұғыл түрде екі аптаның ішінде гипюр матасынан аппақ әдемі көйлек тігіп бердік. Ең алдымен Розаның естелік видеоларын қарап, дәл видеолардағыдай 80 жылғы стильдегі көйлектің жеңін, моншақтары мен шілтер матасына дейін ұқсатып, жаңаша көзқараспен қазір трендтегі сары май түстес реңктен ақ көйлек тіктік. Соңында тамаша перфоманс жасап шығарғанымызға қатты қуаныштымыз. Роза енді бұл көйлекті осы кеште ғана киіп қоймай, сахнаға шыққанда да киеді деген сенімдеміз", — деп жазды Қауменова өз желі парақшасында.
Желі қолданушылары әншінің қуанышына ортақтасып, ақ тілектерін жаудырды.
"Алла тіл көзден сақтасын, ғұмырлы болыңдар", "Құтты болсын, алтын тойды нәсіп етсін, Алла. Менің сүйікті әншім, Роза. Отбастарыңа амандық, дендеріңе саулық тілеймін. Жұптарың жазылмасын", "Өте күшті ән екен. Құтты болсын, күміс той. Той тойға ұлассын. Оң болсын. Өте күшті", — деп жазды пікір қалдырушылар.
Айта кетейік, Роза Әлқожа биылғы қаңтар айында немерелі болды. Әнші "Әже боп ояндым" деп көпшіліктен сүйінші сұраған еді.
Мәтіннен қате тапсаңыз, бізге жазыңыз
