Бұл бюджет қаржысын заңсыз алған азаматтарға қатысты болмақ .
Еңбек және халықты әлеуметтік қорғау министрі Светлана Жақыпова Қазақстаннан бөлек, басқа елде зейнетақы алып келген азаматтарға қандай шара қолданылатынын айтты, деп хабарлайды inbusiness.kz сайты.
"Бір ғана жаза бар, бұл – заңсыз алынған бюджет қаржысын қайтару. Еңбек министрлігінде олардың Қазақстаннан қашан заңсыз шыққаны, қашан тіркеуден шыққаны, елде қанша уақыт тұрмағаны жөнінде ақпарат жоқ. Шығын сомасын құзырлы орган анықтауы тиіс, бұл – қаржы мониторингі агенттігі. Барлық материал берілді. Тергеу жұмыстары жүріп жатыр", – деді ведомство басшысы Мәжіліс кулуарында.
Оның сөзінше, осы уақытқа дейін Қазақстаннан бөлек басқа елдерде зейнетақы алып келгендер алған ақшаны қайтаруы тиіс.
"Қазақта "ұрлықтың арты қорлық" деген жақсы сөз бар. Олай алдамау керек еді. Мемлекетті алдадым деп, ол кісілер өздерін алдады", – деп атап өтті министр.
