Түркістан облысы, Ордабасы ауданына қарасты Ықыластемір елді мекенінде жаңа өндіріс орны – «Altyn Land» ЖШС-ның автоматтандырылған қыш зауыты ресми түрде пайдалануға берілді . Бұл – өңірдің индустриялық-инновациялық дамуына серпін беретін тағы бір ірі жоба.
Зауыттың ашылу салтанатына Түркістан облысының әкімі Нұралхан Көшеров арнайы қатысып, өндіріс ұжымын қуанышты сәтпен құттықтады. Аймақ басшысы кәсіпорынның аймақ экономикасына қосар үлесіне ерекше тоқталып, бұл нысанның маңызын атап өтті.
– Бүгін біз Түркістан облысында заманауи әрі инновациялық кірпіш зауытының ашылуына куә болып отырмыз. Бұл тек өндірістік нысан ғана емес, бұл – біздің ортақ күш-жігеріміздің, стратегиялық жоспарларымыздың нақты нәтижесі. Мемлекет басшысы Қасым-Жомарт Кемелұлы Тоқаев өз Жолдауында жергілікті өнім өндірушілерді қолдау қажеттігін ерекше атап өткен болатын. Осы орайда, біз облысымызда отандық өндірісті дамытуға, кәсіпкерлікті қолдауға жүйелі түрде көңіл бөліп келеміз. Қысқа мерзім ішінде салынып, іске қосылған бұл зауыт – инвесторлар мен жергілікті биліктің тиімді әріптестігінің айқын көрінісі. Жаңа кәсіпорын салық түсімдерін арттырып, жергілікті бюджетті нығайтады. Сонымен бірге құрылыс саласына серпін беріп, тұрғындарды сапалы өніммен қамтамасыз етеді. Осы зауыттан шыққан өнімдер тек облыс көлемінде ғана емес, көршілес аймақтарға да жеткізілетін болады. Бұл – шағын және орта бизнестің дамуына үлкен қолдау. Әкімдік тарапынан мұндай жобаларға әрдайым жан-жақты жағдай жасалатын болады. Жаңа кәсіпорынға зор табыс, жұмысшыларға еңбекте жеміс тілеймін, – деді Нұралхан Оралбайұлы.
Жоба толықтай жеке инвестор қаражаты есебінен жүзеге асырылды. Құны 2,3 млрд теңгені құрайтын зауыттың құрылысы 2024 жылдың сәуір айында басталып, небәрі төрт ай ішінде, тамызда аяқталды. Қысқа мерзім ішінде салынған нысан қазіргі таңда өндіріс қуатын сынақтан өткізіп жатыр. Мұнда жылына 90 миллион дана кірпіш шығарылады деп жоспарланған. Жаңа зауыттың іске қосылуы нәтижесінде 120 адам тұрақты жұмыспен қамтылды. Бұл – аудан тұрғындары үшін әлеуметтік тұрғыдан да маңызды қолдау.
Зауытта соңғы үлгідегі Қытай технологиясына негізделген жылжымалы туннельді пеш жүйесі орнатылған. Өндіріс процесі толықтай автоматтандырылған. Бұл өнімнің сапасын арттырып қана қоймай, еңбек өнімділігін де бірнеше есе жоғарылатады. Зауыттың тағы бір ерекшелігі – экологиялық тиімділігі. Кірпіш күйдіру кезінде газ қолданылатындықтан, ауаға таралатын зиянды қалдықтар мөлшері барынша азаяды. Бұл қоршаған ортаны қорғауға бағытталған маңызды қадамдардың бірі.
Жаңа кәсіпорын 3 гектар аумаққа орналасқан. Заманауи жабдықтармен қамтылған өндірістік желіде кірпіштің бірнеше түрі дайындалады. Алдағы уақытта кәсіпорын ішкі нарықты сапалы өніммен толық қамтамасыз етуді көздеп отыр. Сонымен қатар, өнімнің бір бөлігін экспортқа шығару да жоспарланған.
Бұл – Ордабасы ауданындағы өнеркәсіптік инфрақұрылымды дамытуға, жаңа жұмыс орындарын ашуға, халықтың әл-ауқатын арттыруға ықпал ететін ауқымды жоба. Түркістан облысы әкімдігі тарапынан мұндай өндірістерге қолдау көрсету жалғаса бермек.
