Сарыағаш ауданында «Ауыл – Ел бесігі» бағдарламасы аясында тұрғындардың өмір сүру сапасын жақсартуға бағытталған бірқатар инфрақұрылымдық жобалар жүзеге асуда. Соның ішінде Дербісек ауылдық округінде ішкі көшелерді орташа жөндеу жұмыстары басталып, бүгінде асфальт төсеу ісі қызу жүргізіліп жатыр.
Аудан әкімі Арман Абдуллаев аталған жобалардың орындалу барысымен арнайы танысып, құрылыс нысандарын аралап көрді. Жол жөндеу жұмыстарының сапасын тексерген әкім мердігер ұйымдарға жұмысты уақытылы әрі сапалы аяқтауды қатаң тапсырды. Сонымен бірге, сала басшыларына жол сапасына тұрақты бақылауды күшейтуді міндеттеді.
Жоспар бойынша Дербісек ауылдық округінде барлығы 31 көшеге орташа жөндеу жұмыстары жүргізіледі. Бұл жұмыстар екі мердігер мекеменің күшімен жүзеге асуда. Атап айтқанда, 15 көшенің жөндеуін «Bairkum company» ЖШС қолға алса, қалған 16 көшенің құрылысын «Artd group» ЖШС атқаруда. Қазіргі таңда «Artd group» ЖШС асфальт жабындысын төсеу жұмыстарын бастап кетті.
Жөндеу барысын бақылау кезінде аудан әкімі Арман Абдуллаев ауыл тұрғындарымен кездесіп, олардың ұсыныс-пікірлерін тыңдады. Халықтың талап-тілегін ескеріп, тиісті сала басшыларына нақты тапсырмалар жүктеді.
Бұл жұмыстардың нәтижесінде Дербісек ауылындағы жолдардың жағдайы айтарлықтай жақсарып, ауылішілік қатынас жеңілдеп, тұрғындардың тұрмыс сапасы артады деп күтілуде.
