Мәжіліс ең төменгі жалақыны айқындау тәсілдеріне қатысты №131 Халықаралық еңбек ұйымы конвенциясын бекітті. Бұл құжатта дамушы елдердің жағдайы ерекше ескерілген, деп хабарлайды Egemen.kz.
№131 конвенцияны ратификациялау Қазақстанның ең төменгі жалақыны айқындайтын қолданыстағы тәсілдерін халықаралық деңгейде бекітеді. Сондай-ақ Қазақстанның Халықаралық еңбек ұйымына мүшелігі аясында халықаралық міндеттемелерге адалдығын растауға мүмкіндік береді.
Құжатта мынадай жалпы принциптер айқындалады:
- Ең төменгі жалақы жүйесін енгізу;
- Әлеуметтік әріптестік тараптарының ең төменгі жалақыны белгілеуге және қайта қарауға қатысуы;
- Ең төменгі жалақыны анықтау кезінде экономикалық факторлар мен жұмысшылардың қажеттіліктерін есепке алу;
- Еңбекақы саласындағы кемсітушілікке тыйым салу.
Естеріңізге сала кетейік,
Қазақстан 1993 жылдан бері Халықаралық еңбек ұйымының толыққанды мүшесі және осы уақыт аралығында еңбек жағдайлары, еңбекті қорғау, әлеуметтік қорғау мен әлеуметтік диалогқа қатысты 28 конвенцияны ратификациялады.
Ал қазіргі таңда ең төменгі жалақыны айқындау жөніндегі №131 конвенцияны әлемнің 54 елі мақұлдаған. Олардың ішінде ТМД мемлекеттерінен Армения мен Әзербайжан бар.
