Екі полицей өртеніп жатқан үйден алдымен кәмелетке толмаған 3 баланы қауіпсіз жерге шығарған.
Балаларды көрпелерге орап, уақытша патрульдік көлікке орналастырған, деп хабарлайды inbusiness.kz сайты Polisia.kz-ке сілтеме жасап.
Оқиға 24 мамыр күні түнгі сағат 01:20 шамасында Астраханка ауылында болған. Солтүстік Қазақстан облысы, Аққайың ауданында патрульдік полиция батальонының қызметкерлері қызмет барысында бір отбасыны өрттен аман алып қалды.
Полиция инспекторлары Ғабит Сабитов пен Руслан Қасымов түнгі патруль кезінде Пушкин көшесіндегі үйдің мұржасынан шыққан жалынды байқап, дереу әрекетке көшкен.
Алдымен балаларды алып шығып, содан кейін үйдің шатырына көтеріліп, үй иесіне пештің мұржасындағы өрт ошағын сумен сөндіруге көмектесті. Белгілі болғандай, түн ортасында анасы түтіннің иісін сезіп, күйеуін оятқан. Ол су құйылған ыдыспен шатырға көтерілген кезде, полиция қызметкерлері келіп жетіп, жағдайды бақылауға алды.
Полиция қызметкерлерінің жедел және кәсіби әрекеттерінің арқасында отбасы мүшелері зардап шекпей, өрттің алдын алды. Оқиғадан кейін, инспекторлар республикалық маңызы бар Астана–Петропавл автожолында патрульдік қызметін жалғастырып, жол қозғалысы ережелерінің бұзылуын болдырмау бойынша жұмыстарын жүргізді.
