Түркістан облысының әкімі Нұралхан Көшеровтің тапсырмасына сәйкес өңірде инвестиция тарту бағытындағы жұмыстар қарқын алып келеді. Осы мақсатта аудан әкімі Мақсат Таңғатаровтың төрағалығымен өткен жиында инвесторлармен және кәсіпкерлермен ынтымақтастық туралы меморандумға қол қойылды.
Келісім аясында Сауран ауданында жалпы құны 3,1 млрд теңгені құрайтын екі ірі жоба жүзеге асырылмақ. Оның бірі – Шаға ауылдық округінде салынатын сэндвич-панельдер өндіретін «Euro Sandwich Panel» ЖШС зауыты. Жобаның құны 2,1 млрд теңге, қуаттылығы жылына 900 мың м² өнім, аумағы 2,5 гектарды қамтиды. Кәсіпорын 2025–2026 жылдары іске қосылып, 30 адамды жұмыспен қамтуы жоспарланған.
Екінші жоба – Жүйнек ауылдық округінде салынатын «JADO GROUP» ЖШС жиһаз фабрикасы. Құны 300 млн теңге, аумағы 1,4 гектар болатын өндіріс орны айына 1000 дана жиһаз шығаруға қауқарлы. Бұл нысан да 2025–2026 жылдары іске қосылып, 30 тұрғынға тұрақты жұмыс орнын ұсынады.
Жиында кәсіпкерлікті қолдау мақсатында іске қосылған Шаға өндірістік алаңының жұмысы таныстырылды. Мұнда бүгінгі күнге дейін 10 ғимарат пайдалануға беріліп, 500 жаңа жұмыс орны ашылған. Жыл соңына дейін тағы 30 өндірістік нысан іске қосылып, қосымша 70 гектар жер бөлінбек. Қазіргі таңда инженерлік инфрақұрылым жүйелеріне жобалық-сметалық құжаттар дайындалуда.
Сонымен бірге Қарашық, Иассы, Үшқайық, Шорнақ, Жүйнек ауылдық округтерінде шағын өндірістік алаңдардың құрылысы жүргізіліп жатыр. Бұл алаңдарда кәсіпкерлерді бір орталыққа шоғырландыру арқылы өндіріс орындарының жұмысын жүйелеу және өнімдерді нарыққа бірлесе шығару мүмкіндігі артады. Алдағы уақытта Бабайқорған, Ескі Иқан, Жаңа Иқан және Майдантал ауылдық округтерінде де осындай өндірістік алаңдар салу жоспарланып, жер рәсімдеу жұмыстары басталды.
