Денсаулық сақтау министрлігі мектеп сөмкесіне қатысты ата-аналарға үндеу жасады.
Онда оқушыларға арналған сөмкелерді қалай дұрыс таңдау керектігі де айтылған, деп хабарлайды inbusiness.kz сайты.
Ведомствоның баспасөз қызметінің мәліметінше, балаға арналған сөмкені таңдау атүсті қарайтын мәселе емес. Мұны медицина қызметкерлері де растайды. Мысалы, тым ауыр әрі қолайсыз сөмке оқушының денсаулығына айтарлықтай зиян келтіреді. Министрлік өкілдері сөмкенің салмағы баланың дене салмағының 10%-нан аспауы тиіс екенін ескертіп отыр.
Нормаларға сәйкес салмақ:
• 1-3-сынып – 2 келіге дейін;
• 4-5-сынып – 2,5 келіге дейін;
• 6-7-сынып – 3,5 келіге дейін;
• 8-11-сынып – 4,5 келіге дейін.
– Кең әрі жұмсақ төсемді белдіктері бар, арқасы ортопедиялық болып келетін сөмкелерді таңдау керек. Оған қоса, сөмкенің жеңіл және су өткізбейтін материалдан жасалуы маңызды, жарық шағылыстырғыштар да міндетті түрде болуы керек, – дейді министрлік мамандары.
Мамандар ата-аналарды баланың сөмкесін артық заттардан тазалап тұруға, оны екі иыққа бірдей тағып жүруге үйретуге шақырды. Сөмке тым ауыр болса, кітаптарды мектепте қалдыруға болады. Бірақ, мұны мұғаліммен ақылдасқан дұрыс.
