Сала маманы мемлекеттер қылмыс әлемінен нені үйрену керектігін атады.
Алаяқтарға Қазақстанда 2024 жылы ақпанда қолданысқа енгізілген "Стоп кредит" жобасы да (несие алудан ерікті түрде бас тарту) тоқтау бола алмай тұр. Олар әлеуметтік инженерия тәсілдері арқылы өз құрбандарын бұл сервистен бас тартуға мәжбүрлейді. Бұл туралы Цифрлық даму министрлігінің Ақпараттық қауіпсіздік комитетінің төрағасы Руслан Әбдіқалықов Мәскеуде өткен Positive hack days фестивалінің аясында журналистердің сұрақтарына жауап беру кезінде айтты.
"Стоп кредит" арқылы сіз өзіңізге, сәйкесінше өзгелерге де сіздің атыңыздан несие рәсімдеуге шектеу қоясыз. Бірақ, бұл алаяқтық әрекеттерге тоқтау болды ма? Жоқ, өйткені алаяқ өз құрбанын мобильді қосымшаға, оның ішінде қажетті бөлімге кіріп, салынған тыйымды алып тастауға көндіріп жатыр. Яғни, мемлекет алаяқтармен күрес бойынша қандай техникалық шараларды қолға алмасын, ең бірінші кезекте әрбір азаматтың өзінің хабардар, саналы болуы маңызды. Әр адам өзін кез-келген уақытта алаяқтар алдап кетуі мүмкін екенін және одан қорғанудың негізгі тәсілдерін білуі керек. Мемлекеттің ұстанымы да қойып отырған міндеті де осындай", – деді Руслан Әбдіқалықов.
Оқи отырыңыз: Қазақстан неге хакерлердің қызметіне ақша төлеуді қолдайды
Комитет төрағасы Қазақстанда барлық қылмыс ішінде киберқылмыстар өз үлесі бойынша бірінші орында екенін айта келе, неге мемлекеттер қылмыс әлемінен жеңіліп жатқаны туралы жауап берді. Маманның айтуынша, қылмыстық әлемде шекара деген дүние жоқ. Яғни, елдер арасында мемлекеттік шекара киберқылмыскерлер үшін ешқандай тосқауыл емес.
"Ал мемлекеттерге қылмыс әлемімен күресте осы шекара және өзара әрекеттің әлсіздігі кедергі. Қазақстан мысалында айтсақ, біздің елде қаржылық алаяқтық жасап, шетелге қашып кеткендерді біз кез-келген елден экстрадициялай алмаймыз. "Өз халқымызға тигізіп жатқан зияны жоқ болса, бұл іске араласып нём бар" дейтін елдер табылады. Сондықтан, Қазақстан киберқауіпсіздік мәселесінде елдер арасындағы шекараны жойып, мемлекеттердің бірге ашық әрі адал жұмыс жүргізуін қолдайды. Ешбір ел жалғыз өзі киберқылмыс әлемін жеңе алмайды. Тек бірігу арқылы ғана біз оларға жедел әрі нақты жауап бере аламыз", – деді Руслан Әбдіқалықов.
Ақпараттық қауіпсіздік комитетінің төрағасының мәліметінше, ақпараттық технологияларға бөлінетін қаражаттың 10-15 пайызын ақпараттық қауіпсіздікке бөлу жеткілікті. Алайда, Қазақстанда оның үлесі 3-5 пайыз шамасында ғана.
"Оны 10 пайызға дейін арттыруды жоспарлап отырмыз", – деп түйіндеді маман.
Оқи отырыңыз:
"Қазақша сөйлеңіз". Ақпараттық қауіпсіздік комитетінің басшысы алаяқтармен күрес туралы
Ұлттық банк пен телеком операторлары антифрод орталықтарын біріктіруде. Бұл не үшін қажет
