Қос азаматтықтың арқасында кейбіреулер зейнетақыны Қазақстаннан, әрі Ресейден және Өзбекстаннан алып келген.
Үкімет кулуарында Еңбек және халықты әлеуметтік қорғау министрі Светлана Жақыпова қос азаматтығы бар адамдарға зейнетақы төлемдерін тоқтату бастамасына қатысты журналистердің сұрақтарына жауап берді, деп хабарлайды inbusiness.kz сайты.
Оның айтуынша, бұл – қоғамда талқылауға ұсынылған консультативтік құжат.
"Нормативтік-құқықтық актілерді әзірлеу талаптарына сәйкес ол ашық НҚА-ға жарияланды. Қоғамда талқыланып, кейін шешім қабылданады. Бүгінгі күні бізде кей зейнеткерлердің Қазақстан аумағында тұрмайтыны, екінші азаматтығы бар болып, елден тыс жерде өмір сүретіні анықталды. Сондықтан қазір тек зейнеткерлерге ғана емес, тұрғылықты жер бойынша тіркелу талабы бойынша да қатаңдату жүріп жатыр", – деді министр.
Сонымен бірге, уақытша шығулар есепке алынбайтынын ол нақтылады.
"Егер зейнеткердің тұрғылықты мекенжайы бойынша тіркеуі бар болып, уақытша сыртқа шықса, бұл норма оған қатысты емес. Төлемдер уақытша тоқтатылады. Ол елге оралғанда қос азаматтығы жоқ екені, басқа елден зейнетақы алмағаны расталса, зейнетақы қайта тағайындалады. Біздің қабылдап жатқан нормаларымыз заңды сақтайтын қазақстандықтардың құқығын шектемейді", – деп атап өтті Жақыпова.
Министрдің айтуынша, бұл шаралар әлеуметтік әділдікті қалпына келтіруге, заңға бағынатын салық төлеушілердің мүддесін қорғауға бағытталған.
"Себебі сіздер үшін де төлеп отырған жеке табыс салығыңыздың қайда жұмсалатыны маңызды. Бізде қос азаматтық арқылы Ресейден де, Өзбекстаннан да, Қазақстаннан да зейнетақы алып жүргендер бар. Әсіресе Қазақстандағы төлем мөлшері әлдеқайда жоғары болғандықтан, олар басқа елдегі зейнетақысын қалпына келтіргенімен, Қазақстандағысын қалдырған жағдайлар кездескен", – деді ол.
