Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасына сәйкес, облыс әкімдігінде тұрғындарды жеке қабылдау дәстүрге айналды.
Облыс әкімі Нұралхан Көшеров кезекті қабылдау барысында Түркістан, Кентау қалалары мен Қазығұрт, Сарыағаш, Жетісай, Шардара аудандарының азаматтарымен жүздесті. Жиынға жауапты сала басшылары да қатысып, тұрғындар көтерген мәселелерді тыңдады.
Кездесу барысында коммуналдық шаруашылық, экология, заңсыз құрылыс, тұрғын үй сапасы, кәсіпкерлік, жұмыспен қамту және әлеуметтік қызмет көрсету бағыттарындағы проблемалар сөз болды. Мәселен, Сарыағаш тұрғыны кәсіпкерлік нысанға қатысты өтінішін білдірсе, жетісайлық азамат әлеуметтік саладағы олқылықтарды атап өтті. Кентаулық тұрғын ауыз су мен қоқыс полигонына байланысты мәселе көтерсе, қазығұрттық азаматша тұрғын үй сапасына шағымданды.
Аймақ басшысы барлық өтініш пен ұсынысты назарға алып, заң аясында шешу үшін тиісті басқарма басшыларына нақты тапсырмалар берді. Сондай-ақ, өңірді дамытуда тұрғындардың пікірлері маңызды екенін ерекше атап өтті.
