1 қыркүйек – Білім күні мерекесінде Келес ауданының Біртілек ауылдық округінде 300 орынға арналған №66 жалпы орта мектептің салтанатты ашылуы өтті. Бұл – Мемлекет басшысы Қасым-Жомарт Тоқаевтың бастамасымен қолға алынған « Келешек мектеп» ұлттық жобасы аясында іске асқан игі іс.
Салтанатты шараға Түркістан облысы әкімінің орынбасары Бейсенбай Тәжібаев, Келес ауданының әкімі Жәнібек Ағыбаев, жергілікті тұрғындар мен ұстаздар қауымы, ата-аналар мен оқушылар қатысты. Жиынға жиналғандарды құттықтаған облыс әкімінің орынбасары жаңа оқу жылының ерекшеліктеріне тоқталды.
— Бүгін біз 1 қыркүйек – Білім күні қарсаңында тағы бір қуанышты жаңалыққа куә болып отырмыз. Биыл облыс бойынша 48 мыңнан астам бүлдіршін 1-сыныпқа қабылданды. Балалар санының артуы – біз үшін үлкен жауапкершілік. Осы ретте Мемлекет басшысының бастамасымен жүзеге асқан «Келешек мектеп» жобасы – ел болашағына жасалған аса маңызды инвестиция. Өңірімізде аталмыш жоба аясында 29 мектептің құрылысы жүріп жатыр. Өткен жылы 13 жаңа мектеп пайдалануға берілсе, биылғы оқу жылында тағы 16 мектеп іске қосылады. Ал Келес ауданында бірден үш жаңа мектептің пайдалануға берілуі – балаларымыздың жарқын болашағына жол ашады, – деді Бейсенбай Тәжібаев.
Заманауи стандарттарға сай бой көтерген жаңа мектептің ішкі инфрақұрылымы оқушыларға сапалы білім алуға толық мүмкіндік береді. Мұнда кең әрі жарық оқу кабинеттері, заманауи пәндік зертханалар, спорт залы, асхана, кітапхана бар. Сонымен бірге, инклюзивті білім беруге арналған сыныптар, сенсорлық бөлме, музыкалық аспаптармен жабдықталған музыка кабинеті, би үйірмесіне арналған арнайы бөлме, робототехника және STEM зертханалары қарастырылған.
Ауыл тұрғындары үшін бұл мектептің маңызы ерекше. Бұған дейін 1988 жылы салынған 60 орындық №17 «Еркіндік» бастауыш мектебі ғана жұмыс істеп келген. Соның салдарынан 300-ге жуық бала көршілес Абай ауылындағы мектептерге тасымал арқылы қатынап оқуға мәжбүр болды. Жаңа мектептің пайдалануға берілуімен бұл мәселе түбегейлі шешілді.
Жаңа мектеп ұжымы мен ата-аналар қауымы осындай игілікті істің жүзеге асқанына зор ризашылықтарын білдірді. Олар бұл қадам еліміздің келешегі – жас ұрпақтың сапалы білім алуына жасалған қамқорлық екенін атап өтті.
