Мемлекет басшысы Қазақстан халқына жолдауында қоғамда қызу талқыланып жатқан электросамокат мәселесін көтеріп, бұл саланы реттейтін заңға түзетулерді тезірек қабылдау керектігін айтты. Бұл туралы Ақордаға сілтеме жасаған KAZ.NUR.KZ хабарлайды.
Президенттің айтуынша, елімізде біраз жұмыс атқарылғанына қарамастан, көлік апаттары азаймай тұр
"Халықтың өмірі мен денсаулығына тікелей әсер ететін тағы бір түйткіл, бұл – жол қауіпсіздігі. Мен былтырғы жолдауда бұған арнайы тоқталдым.
Әрине біраз шаруа жасалып жатыр. Соған қарамастан, көлік апаттары азаймай тұр. Жыл басынан бері 22 мыңнан астам жол-көлік оқиғасы тіркелген. Шын мәнінде, көп нәрсе көлік жүргізушілерінің өзіне байланысты, себебі жол ережесін бұзатындар аз емес.
Әрбір адам өз өміріне және айналасындағы адамдардың қауіпсіздігіне жауапты екенін сезінуге тиіс. Көлік жүргізу мәдениетін бүкіл қоғам болып қалыптастыру қажет", — деді Қасым-Жомарт Тоқаев.
Президент сондай-ақ электросамокаттарға назар аударған жөн екенін айтты.
"Бұл тақырып қоғамда қызу талқыланып жатыр. Екі жыл бұрын жаяу жүргіншілер жолымен жүруге шектеу қоятын заңнамалық өзгерістер енгізілді. Бірақ қоғамдық орындардағы ахуал өзгере қойған жоқ, әлі де азаматтарға қауіп-қатер төніп тұр.
Қазір бұл саланы реттейтін заңға түзетулер әзірленді. Оны көп созбай қабылдау керек. Әрбір азаматтың, әрбір баланың өмірі қымбат. Бұл мәселеде ұсақ-түйек деген болмайды. Түптеп келгенде, мұның әрқайсысы – Қауіпсіз Қазақстанды құру жолындағы маңызды қадамдар", — деді мемлекет басшысы.
Мәтіннен қате тапсаңыз, бізге жазыңыз
