Италияда күзгі классикалық жарыстар басталды .
XDS Astana Team командасының велошабандозы Кристиан Скарони Италиядағы күзгі классикалық жарыстар маусымын ашқан, Ларчано қаласында өткен "Индустрия Гран-приі & Артиджанато" біркүндік бәйгесінде екінші орынға ие болды.
Скарони соңғы асуда италиялық Давиде Пиганцолимен бірге шабуыл жасады. Кейіннен оларға мексикалық Исак Дель Торо қосылды. Үш велошабандоз шағын басымдыққа ие болып, оны мәреге дейін сақтап, жеңісті спринтте өзара сарапқа салды.
"Команда керемет жұмыс атқарды, жігіттер 100% барын салып, мені соңғы өрлеуге жақсы позицияға жеткізді. Мен Пиганцолимен бірге шабуылға шықтым, басты фаворит Дель Тороның шабуылын алдын ала болжауға тырыстым. Біз аздаған басымдық алдық, бірақ өрлеудің жазықтау бөлігінде Дель Торо бізді қуып жетті. Онымен спринтте жарысу оңай емес. Қолымнан келгеннің бәрін жасадым. Бірақ екінші орынға ие болдым. Дегенмен, бүгінгі жарысқа және жеңіс тұғырына көтерілгеніме ризамын. Алда Италияда тағы бір апталық жарыс күтіп тұр. Бізде мықты команда бар. Сондықтан жақсы нәтижеге жетеміз деп үміттенемін", – деді Кристиан Скарони.
XDS Astana Team командасының өзге шабандоздары Симоне Веласко мен Диего Улисси сәйкесінше 9-шы және 12-ші орындарға ие болды.
