Сарапшылар бұл матчтың айқын фавориті Бельгия деп отыр. Себебі олар соңғы ойында Лихтенштейнді 6:0 есебімен тас талқан еткен екен.
7 қыркүйектен 8 қыркүйекке қараған түні Брюссельде Бельгия құрамасы футболдан 2026 жылғы әлем чемпионатының іріктеу кезеңі аясында Қазақстан құрамасымен кездеседі. Бельгия – Қазақстан матчының тікелей трансляциясы Қазақстан уақытымен 23:45-те басталады.
Осы орайда Қазақстан құрамасының бас бапкері Әли Әлиев Бельгия құрамасына қарсы матч алдындағы ойымен бөлісті.
– Бельгияға кеше келдік. Уэльспен өткен матчтан кейін ауыр жарақат пен шығындар болмағанына қуаныштымын. Жеті сағат ұштық. Қазір ең маңыздысы – ойыншылардың функционалдық және психологиялық жағдайын қалпына келтіру. Уақыт аз, сондықтан бапкерлік штабпен және медициналық персоналмен бірге жұмыстарды қысқа мерзімде орындауға тырысамыз. Ротация арқылы алаңға футболшыларды өз міндеті бойынша шығарамыз. Жалпы, команданың және ойыншылардың жағдайына көңіліміз толады, — дейді бапкер.
ӘЧ-2026 іріктеуіндегі үш ойыннан кейін Бельгия жеті ұпай жинады. Қазақстан құрамасы төрт матч өткізді. Бірақ әзірге үш-ақ ұпай еншілеп отыр. Әли Әлиевтің командасы соңғы ойында өз алаңында Уэльс құрамасына 0:1 есебімен есе жіберді. Ал бельгиялықтар соңғы кездесуде сырт алаңда Лихтенштейнді ірі есеппен – 6:0 есебімен жеңді.
