Жасанды интеллекттің экономиканы автоматтандыруы жағынан Қытай АҚШ-тан 10 жылға озып кетті. Сондықтан Қазақстан мен Қытай нарықтарының жақындасуы аса маңызды мәнге ие. Astana Finance Days 2025 -те танымал футуролог, қаржы, технология мен қоғамның болашағы туралы медиа сарапшы, FinTech тақырыбындағы ең танымал Breaking Banks подкастының жүргізушісі Бретт Кинг осындай пікір білдірді.
«Қазір мен «Bank 5.0» атты кітабын жазудамын. Бұл еңбекте болашақ қандай болатынын, оған жасанды интеллекттің қалай ықпал ететінін, сондай-ақ кванттық технологиялар мен финтехтің банк секторының болашағын қазірдің өзінде қалай өзгертіп жатқанын айтамын», дейді Бретт Кинг.
Оның айтуынша «Bank 1.0» – бұл XIV ғасырдан, Медичи банкінің заманынан бері эволюцияланып келе жатқан дәстүрлі банктер. Дәстүрлі банктер әлі күнге дейін бар. Бұл – филиалдарға сүйенетін, дәстүрлі өнімдерге негізделген банктік жүйе.
«Bank 2.0» – банкоматтар, телефон арқылы банкинг және интернет-банкингпен өзіне-өзі қызмет көрсететін банктер. Бұл модель 1990-жылдары қалыптаса бастады.
«2007 жылы Стив Джобс бізге iPhone-ды сыйлады. Сол платформада цифрлық банктерге бағытталған жаңа үлгі пайда болды – бұл 3.0 нұсқасы. Ал қазір біз 4.0 дәуіріне қадам басып отырмыз – бұл жасанды интеллект барлық процеске енетін ендірілген банктік қызметтер кезеңі. Банк секторы енді жалғыз төлем тәсілі емес. Ірі технологиялық ойыншылар Apple Pay, AliPay және басқа жүйелер бар. Әлемдегі ең ірі қаржылық институт – клиенттер саны бойынша AliPay-дің бас компаниясы Ant Group. Соңғы кезде бұл салада жасанды интеллект компаниялары ірі ойыншыларға айналып жатыр, алып корпорациялар финтех пен қаржылық қызмет бағыты бойынша өздерін сынап көруде. Яғни, технологияға негізделген цифрлық қаржылық сервистер – бұл жаңа дәуір. Бұрын банктер қаржылық өнімдерді ұсынды, бірақ ол үшін банкке бару керек еді. Ал технологиялар бізге мұндай қызметтерді бөлімшелерге бармай-ақ, нақты уақыт режимінде көрсету мүмкіндігін береді», дейді танымал футуролог.
Бретт Кинтің айтуынша аладғы уақытта ЖИ пен сондай-ақ кванттық технологиялар да әлемді өзгертеді.
«Менің ойымша, бұл алдағы бес жылда орын алады. Алдағы 10 жылда әлем автономияға басымдық береді. Жасанды интеллект банк пен қаржы саласында қолданылады, пиццадан бастап ірі заттарға дейін тасымавлдауда пайдаланылады, адамдарсыз жұмыс істейтін зауыттар пайда болады. Мұндай тәуелсіз инфрақұрылым индустриялық экономиканы болашақтың «ақылды» экономикасынан ажыратады. Ең ірі әрі мықты экономикалар – жасанды интеллектті немесе коллаборативті интеллектті өнеркәсіп деңгейінде қолданатын елдер болады. Бүгінде технологияларды автономды қолдану тұрғысынан АҚШ емес, Қытай әлемдегі ең озық экономика болып отыр», дейді футуролог.
