2022 жылғы қаңтар оқиғасы кезінде Алматыдағы президент резиденциясы өртеніп кеткен болатын. Кейін билік оны сүріп, орнына саябақ салуды ұйғарды. Саябақ қашан дайын болатынын KAZ.NUR.KZ тілшісі анықтап көрді.
Шешім қабылданғанына үш жылдан астам уақыт өткендіктен, біз Алматы қалалық қоғамдық кеңістіктерді дамыту басқармасына сауал жолдадық. Басқарма өкілдері қазіргі уақытта құрылыс-монтаждау жұмыстары 70 пайызға орындалғанын хабарлады.
Басқарма өкілдерінің сөзіне сенсек, жұмыс айтарлықтай ауқымды болды — ғимарат, субұрқақ, тіпті брусчатка мен бетон іргетасы сүрілді. Жалпы нысанның тұжырымдамасы өзгерген жоқ, деп сендірді ведомстводағылар.
Ұңғыма қазылып, тоған салынды. Сондай-ақ су құбыры мен кәріз жүйесі тартылды. Басқарманың берген жауабына сәйкес, саябаққа қазірдің өзінде 323 көшет отырғызылған. Алматылықтардың "сүйікті" бордюрлері де назардан тыс қалмады.
"Бүгінгі таңда бордюрлерді орнату және жаяу жүргіншілер жолдарын салу жұмыстары аяқталуда, инженерлік корпустың төбесінде жасыл желек отырғызу үшін субстрат негізі дайындалып, террасалық тақтайдан жасалған жаяу жүргіншілер аймағы орнатылып жатыр.
Автоматты суару жүйесін орнату жұмыстары қарқынды жүргізілуде. Көгалдар, бұталар мен жерүсті өсімдіктері отырғызылып жатыр. Сондай-ақ учаскеде шағын архитектуралық пішіндерді орнату, бейнебақылау жүргізу, саябақтың периметрі бойынша қолданыстағы қоршауды жаңарту, пандус қоршауын орнату керек, жерасты техникалық блоктың, қоғамдық дәретхананың, АПТ баспалдақтарының және қызмет көрсету ғимараты кіреберіс баспалдақтарының ішкі және сыртқы әрлеу жұмыстарын аяқтау қажет", — деп хабарлады басқарма өкілдері.
Құрылыс-монтаждау жұмыстары келесі айда – 2025 жылғы қазанда аяқталады деп жоспарланып отыр. Саябақты уақытында салып біту шынымен мүмкін бе, жоқ па, жақын арада белгілі болады.
Басқарма барлық абаттандыру жұмысы демеушілік қаражат есебінен жүргізіліп жатқанын мәлімдеді.
Эксклюзив
- "Өмірі қыл үстінде": Алматы облысында 7 жасар баланы аман алып қалуға 1,5 млрд теңге қажет
- "Бетке салық, сүйекке таңба": АИТВ-мен өмір сүретіндерді "түнектен" шығару жолы қандай
Мәтіннен қате тапсаңыз, бізге жазыңыз
