AMANAT партиясы фракциясының кеңейтілген отырысында Премьер-министр Олжас Бектенов тарифтік реформаны жалғастыру және энергетика мен коммуналдық секторларда Ұлттық жобаны жүзеге асырудың маңызын атап өтті.
Оның айтуынша, соңғы екі жарым жылда инженерлік инфрақұрылым мен жылу көздерін жаңғыртуға 600 млрд теңгеден астам инвестиция тартылып, тозу деңгейі 6,2%-ға азайған.
«Қазіргі заманға сай тұрғын үй-коммуналдық шаруашылық жүйесін қалыптастыру үшін бұл жұмысты жалғастырамыз. Ұлттық жоба «Тарифті инвестицияға айырбастау» бағдарламасының жалғасы ретінде 2029 жылға дейін іске асырылмақ. Соның нәтижесінде инженерлік желілердің тозуы 40%-ға дейін қысқарады. Бұл күзгі-қысқы кезеңді тұрақты өткізуге мүмкіндік береді», – деді Бектенов.
