Петропавл қаласында өрт сөндіру және құтқару спортынан Төтенше жағдайлар министрлігінің кубогы сарапқа салынды.
Ерлер мен әйелдер арасында өтіп жатқан жарысқа 300-ге жуық құтқарушы қатысып жатыр. Олар 4 бағыт бойынша сынға түсіп, өзара мықтыны анықтайды.
Қазақстанның әр қиырынан келген құтқарушылар шұғыл шақыртуға емес, жарыс жолына шықты. Бұл жерде де бірінші болып келу керек. Төтенше жағдайлар қызметкерлері 100 метрлік кедергілер жолағын бағындырып жатыр.
Санжар Ибрагим, жарысқа қатысушы:
- Жақсы жүгіруге болатын еді. Жағдайды көріп тұрсыздар. Дайындық болды. Бірақ шөпте жүгіргенге байланысты тайып, қиыншылықтар болып жатыр.
Төтенше жағдайлар қызметкерлерінің біріншілігіне әр облыстан 300-ге жуық құтқарушы қатысып жатыр. Олар өрт сөндіру және құтқару жаттығуларын орындап, нағыз мықтылар ортадан суырылып шықпақ. Жеңімпаздарға спорттық атақтар да беріледі.
Жарыс қорытындысы бойынша құтқарушылар арасында еліміздің ұлттық құрама командасы жасақталады. Олар Сауд Арабиясында өтетін әлем біріншілігіне жолдама алады.
Айдарбек Айтмұхамбетұлы, Төлеген Иманов, 24kz
