Сириядан оралған әйелдің «бесікке салу – ширк» деген пікірі әлеуметтік желіде қызу талқыланды. Оның айтуынша, қазақ дәстүріндегі кейбір салттар діни тұрғыдан дұрыс емес, мысалы шелпек пісіру немесе арнайы ниет жасау шарт емес, деп хабарлайды Skifnews.kz ақпарат порталы.
«Жеті шелпек пісіру міндетті емес, бәрі адамдардың өз ойынан шыққан», – дейді ол.
Алайда бұл пікір көпшіліктің наразылығын тудырды. Пікір қалдырғандардың көбі қазақтың ғасырлар бойы қалыптасқан дәстүрін ширкке теңеуді «ұлттық құндылыққа қол сұғу» деп бағалады. Біреулері қара киім киюді «өлген адамның әдеті» десе, енді бірі қазақтың дәстүрін араб мәдениетімен шатастыруға болмайтынын алға тартты.
Желі қолданушыларының бір бөлігі дінді дұрыс түсінбеу – сауатсыздықтан туындайды деп есептейді. «Қоғам надан болған сайын жалған ағымдар көбейеді. Бұған қарсы күрестің жолы – білім беру, ағартушылық», – деп жазды пікір білдіргендердің бірі.
Бұл тақырып төңірегіндегі пікірталас қазақ қоғамында дәстүр мен діннің ара-жігін ажырату мәселесінің әлі де өткір тұрғанын көрсетті. Бір тарап «дәстүр – ұлттың тамыры» десе, екінші тарап «шариғатқа қайшы келетін әдетті жалғастыруға болмайды» деген уәж айтады.
