Президент Жолдауындағы тапсырмаларды орындау аясында елімізде IT-технологияларды пайдалану арқылы азаматтарға арналған цифрлық қызметтер кеңейіп келеді.
G2C (азаматтарға арналған мемлекет) форматындағы сервистер мемлекеттік қызметтерді жедел, ашық әрі қолжетімді етуге жол ашты, деп жазады inbusiness.kz сайты.
ҚР Цифрлық даму, инновациялар және аэроғарыш өнеркәсібі министрлігінің мәліметінше, медициналық анықтамалар мен еңбекке уақытша жарамсыздық парақтарын цифрландыру көлеңкелі экономиканы 7,5 млрд теңгеге қысқартып, бюджетке 450 млн теңге үнем әкелді. Ал 1,5 млн қызметті қамтитын телемедицина сервисі қашықтан кеңес беріп, диагностика жасауға мүмкіндік беріп, халықтың 13 млрд теңгеден астам қаржысын үнемдеуге ықпал етті.
Білім беру саласында да оң өзгерістер бар: балабақша мен мектепке қабылдау, ЖОО-ға түсу және жатақханаға орналастыру процестері толық онлайн форматқа көшті. Енді бірыңғай сервис арқылы құжат тапсырып, емханаға тіркеліп, әскери есепке тұруға немесе жатақханадан орын алуға болады. ҰБТ нәтижесінің электронды сертификаты енгізіліп, бюджет шығыны 83 млн теңгеге қысқарып, азаматтар шығыны 300 млн теңгеден астам сомаға азайды.
Әлеуметтік салада "Әлеуметтік әмиян" жобасы іске қосылып, мектеп оқушыларына тегін тамақ беру процесі толық бақылауға алынды. Бұл бастама бюджет қаржысын тиімді жұмсауға жол ашып, алдағы уақытта еліміздегі барлық мектептерде жүзеге асырылмақ.
"Әлеуметтік әмиян арқылы тегін тамақ беру процесі бақылауға алынды. Жоба бюджет қаражатын үнемдеп, тиімді пайдалануға мүмкіндік берді. Қазір ол барлық мектептерде енгізілуде", – деді ЦДИАӨМ басшысы Жаслан Мәдиев.
