2025 жылғы 4 қыркүйекте Astana Finance Days 2025 форумы аясында “Астана” халықаралық қаржы орталығы бірегей бастама – «Сенім музейін» таныстырды.
Бұл жаңа жоба қаржы орталығының атынан Қазақстандағы қаржы жүйесінің қалыптасу тарихын Ұлы Жібек жолы кезеңіндегі көне дәуірден бастап, заманауи биржалар мен қаржылық экожүйелердің қазіргі сәтіне дейін баяндайды.
АХҚО Басқарушысы Ренат Бектұровтың айтуынша, «Сенім музейі» барлық қаржы индустриясының негізінде сенім жатқанын көрсетуге бағытталған. «Валюта, бағалы қағаздар, шарттар мен инвестициялар – мұның барлығы адамдар, институттар және мемлекеттер арасындағы сенімге сүйенеді. Ал АХҚО бұл үдерісте тек қаржылық институт ретінде ғана емес, келісімдер мен кепілдіктердің мәдени әрі зияткерлік дәстүрін жалғастыратын платформа ретінде қызмет атқарады», дейді ол.
Музей экспозициясы физикалық және визуалды экспонаттардан тұрады: артефактілер мен құжаттар Қазақстан аумағындағы қаржы жүйесінің даму барысын сезінуге мүмкіндік берсе, мұрағаттық фото және бейнематериалдар, ақпараттық стендтер мен интерактивті инсталляциялар бұл үдерісті жан-жақты баяндайды.
Музей бірнеше залға бөлінген, әр зал тарихтың жеке бір кезеңін ашады. Барлық зал шамамен 40 артефакт пен екі заманауи арт-нысанды қамтиды.
«Заманауи музей құрудағы негізгі үрдіс – тарихи пайым мен шынайылықты көркем тұрғыда түсіндірумен ұштастыру. Біз бұл тұжырымды «Сенім музейінде» жүзеге асырғанымызға қуаныштымыз. Бұл жоба сенім табиғатын тарихи артефактілер мен арт-нысандар арқылы зерттеудің бастауына айналады деп сенеміз», дейді Арт-куратор, Art&Creative Solutions компаниясының директоры Оля Веселова.
