«Астана» халықаралық қаржы орталығында Astana International Forum қолдауымен Astana Finance Days «Болашақтың негізін қалайтын капитал» VIII қаржылық форумы басталды, деп хабарлайды 7kun.kz.

Биылғы іс-шараға жалпы көлемі шамамен 1,5 трлн АҚШ долларын құрайтын активтерді басқаратын компаниялардың өкілдері қатысып жатыр. Бұл форумның Қазақстан мен барша Еуразия өңіріндегі қаржы институттары, бизнес-қауымдастық, мемлекеттік органдар мен сарапшылар үшін кездесулер, келісімдер мен диалог құрудың ең ірі алаңы ретіндегі маңызын көрсетеді.

Форум қонақтарға Қазақстанның рухани діңгегі мен мәдени мұрасын паш ететін сахналық көріністермен басталады. Ұйымдастырушылар мұндай формат арқылы АХҚО қызметінің негізінде жатқан ұлттық құндылықтар – қонақжайлық, әділдік және сенімнің маңызын көрсетуге тырысқан.

Форумды ҚР Премьер-министрінің орынбасары — Ұлттық экономика министрі Серік Жұманғарин ашты. Сондай-ақ АХҚО Басқарушысы Ренат Бектұров құттықтау сөз сөйледі.

«Жыл сайынғы Astana Finance Days форумы заманауи трендтер мен сын-қатерлерді талқылауға, сондай-ақ оларды еңсеру жолдарын іздеуге арналған Еуразия аумағындағы бірегей алаң ретінде өз мәртебесін дәлелдеді. Бұл тұжырымға биыл форумға шамамен 1,5 трлн АҚШ доллары көлеміндегі активтерді басқаратын компания өкілдерінің қатысуы айқын дәлел. Сонымен қатар AFD жаңа серіктестіктерді құруға және нарық үшін маңызды жаңалықтарды жариялауға арналған платформа ретінде жұмысын жалғастырып жатыр. Мәселен, форум аясында стейблкоиндарды пайдалану мүмкіндіктері, цифрлық активтер мен әлеуметтік облигациялар саласындағы жаңа листингтер, исламдық қаржы секторы бойынша бастамалар жарияланады. Форум бағдарламасы кәсіби нарық қатысушылары үшін де, қаржыға қызығушылық танытатын кең аудитория үшін де мазмұнды әрі қызықты болмақ», – деді АХҚО басқарушысы.

Ресми ашылу шарасы АХҚО Басқарушысы Ренат Бектұров пен футуролог, кәсіпкер әрі әлемдік бестселлерлердің авторы Бретт Кингтің қатысуымен өткен Fireside Chat жалғастырады. Бретт Кинг “Банк 4.0: Жаңа қаржылық құбылыс”, “Техносоциализм. Теңсіздік, жасанды интеллект пен климаттың өзгеруі қалай жаңа әлемдік күн тәртібін қалыптастырады”, “Кеңейтілген кеңістік дәуірі” және басқа да бестселлерлердің авторы. Интерактивті диалог форматында олар жасанды интеллекттің болашақты қалыптастыруға ықпалын және қазіргі қаржының қалай өзгеріп жатқанын талқылайды.

«Біз жасанды интеллекттің пайда болуынан бастап климаттық факторлардың ықпалына дейінгі орасан зор өзгерістер дәуірінде өмір сүріп жатырмыз. Алайда бүгіннің өзінде әлемдік банк саласы цифрлық технологиялардың арқасында терең трансформациядан өтіп жатыр: финтехтің клиенттері дәстүрлі банктерге қарағанда 50%-ға көп. Автономды жабдықтау тізбектері мен “ақылды” экономикалар мүлде жаңа банктік инфрақұрылымды қажет етеді, сондықтан стейблкоиндар мен жедел төлем жүйелері қарқынды дамып келеді. 2050 жылы банк секторы бұрынғыдан айқын айырмашылығы бар жаңа бейнеде болады», – дейді Бретт Кинг.