Аталған дерек бойынша " Ұрып-соғу " бабымен қылмыстық іс қозғалды.
Оқиға Төлеби ауданының Зағамбар ауылында болған, деп хабарлайды inbusiness.kz сайты.
Әлеуметтік желіде тараған видеодан тойханада ән айтып тұрған Азода есімді әншіге ер адам соққы жасағанын көруге болады. Салдарынан зардап шеккен әнші жерге құлаған. Одан кейін оған жан-жағындағы адамдар көмек көрсеткен. Кейінірек Азоданың өзі хабарлағандай, шабуыл жасаған адам оның бұрынғы қайын атасы болып шыққан. Оның айтуынша, ол оқиға кезінде мас күйде болған.
"Мен ән айтып тұрған кезде ол келіп, бар күшімен ұрды. Бұл көпшілік алдында, көптеген адамның көзінше болды. Кінәлі заң бойынша жазасын алсын деп өтінемін", – деп жазды әнші өзінің әлеуметтік желідегі парақшасында.
Оның айтуынша, оқиға болған күні ер адам наркологиялық сараптамаға жіберілмеген. Түркістан облыстық Полиция департаментінің баспасөз қызметі оқиғаның болғанын растады.
"Аталған дерек бойынша "Ұрып-соғу" бабымен қылмыстық іс қозғалды. Күдікті анықталып, полицияға жеткізілді. Барлық мән-жайды анықтауға бағытталған қажетті шаралар жүргізіліп жатыр. Тергеу нәтижесі бойынша тиісті шешім қабылданады. Полиция кез келген құқыққа қайшы әрекет заң аясында жауапкершілікке әкелетінін еске салады", – делінген хабарламада.
