Құжат Сенатқа жіберіледі.
Мәжіліс Қазақстан мен Армения үкіметтері арасындағы көші-қон саласындағы ынтымақтастық туралы келісімді ратификациялады, деп хабарлайды inbusiness.kz сайты.
Заң жобасын Ішкі істер министрі Ержан Сәденов таныстырды.
"Келісімге 2024 жылғы сәуірде Мемлекет басшысының Арменияға ресми іссапары шеңберінде қол қойылған. Құжатта тараптар мемлекеттерінің келетін азаматтары, тұратын адамдар саны, олардың құқықтық мәртебесі, азаматтыққа қабылданған адамдар, әкімшілік және қылмыстық жауапқа тартылғандар туралы статистикамен, мәліметтермен алмасу, сондай-ақ заңсыз көші-қон тәсілдері, ұйымдастырушылар,оларға қарсы күрес әдістері және көші-қон заңнамасының ерекшеліктері туралы ақпаратпен алмасу көзделген", – деді ведомство басшысы Мәжілістің жалпы отырысында.
Оның сөзінше, бұл мәліметтер елдерге қос азаматтыққа қарсы күрес және заңсыз көші-қон арналарының жолын кесу үшін қажет.
Құзыретті органдар болып қазақстандық тараптан – Ішкі істер, Еңбек және халықты әлеуметтік қорғау министрліктері; ал Армения тарапынан – Ішкі істер министрлігі белгіленді.
"Келісімде егемендікке, қауіпсіздікке қауіп төнген жағдайда және заңнамаға қайшы келген кезде сұрауды орындаудан бас тарту көзделгенін атап өтемін. Осыған ұқсас келісімдер 6 елмен жасалды. Армения тарапы Келісімді осы жылғы 30 сәуірде ратификациялады", – деді Ержан Сәденов.
