Кейбір қосымша мемлекеттік қолдау шаралары қайта қаралған.
Бұл туралы Еңбек және халықты әлеуметтік қорғау министрі Светлана Жақыпова айтты, деп хабарлайды inbusiness.kz сайты.
Жаңашылдық тұрмыс жағдайы жоғары көпбалалы отбасыларға қатысты болмақ.
"Егер отбасының әл-ауқат деңгейі жоғары болса, яғни отбасы мүшелерінің жан басына шаққандағы табысы 4 ең төменгі күнкөріс деңгейінен асса, бұл әр адамға 200 мың теңгеден жоғары деген сөз. Мәселен, егер 10 адамнан тұратын отбасының жалпы табысы 2 миллион теңгеге жетіп, олардың екі немесе одан да көп жылжымайтын мүлкі, екі немесе одан да көп көлігі болса, онда бұл әл-ауқаты жоғары бар отбасы болып саналады. Мұндай отбасылар көпбалалы деген мәртебеге қарамастан, қосымша мемлекеттік қолдаудан қағылады", – деді министр тілшілердің сауалына берген жауабында.
Светлана Жақыпова мұндай отбасылар қосымша әлеуметтік төлемдер берілмейтінін түсіндірді. Яғни, енді олар атаулы күндерге орай берілетін бір реттік төлемдерді алмайды.
"Мысалы, 8 наурызда көпбалалы аналарды құттықтауға немесе мектепке дайындық кезінде берілетін сөмке, оқу құралдары сияқты көмек түрлері. Яғни, олар енді өзін-өзі толық қамтамасыз етеді", – деді министр.
Бұл ретте ведомство басшысы басқа мемлекеттік төлем түрлері сақталатынын баса айтты. Мысалы, көпбалалы ана мәртебесі үшін берілетін төлемдер қалады.
"Мәселен, отбасында он бала бар отбасы әр ай сайын 120 мың теңгеден астам төлем алуын жалғастырады, бұл әр балаға шаққанда 15 мың теңгеден деген сөз", – деді ол.
