600 мың теңгеден асатын кредиттерге міндетті күту уақыты енгізілді.
Қаржы нарығын реттеу және дамыту агенттігінің төрағасы Мәдина Әбілқасымова қаржы алаяқтығына қарсы күрес аясында несие рәсімдеу тәртібіне енгізілген өзгерістерді таныстырды.
Енді банктер үшін қарыз беруде "салқындату кезеңі" қолданылады. Яғни 255 АЕК-тен (шамамен 1 млн теңге) жоғары кредиттерді рәсімдеу кезінде банк өтінішті бірден мақұлдамайды. Міндетті түрде 24 сағаттық үзіліс болады. Осы уақыт ішінде қарызды рәсімдеушінің шын мәнінде өзі екені, алаяқтық белгілерінің жоқтығы арнайы тексеріледі.
"Бұл өзгеріс қарыз алушының өзі алаяқтардың ықпалына түсіп қалған жағдайда ойлануына, несиеден бас тартуына мүмкіндік береді. 24 сағаттық кезең тек 1 млн теңгеден асатын несиелерге қолданылады", – деді Әбілқасымова парламент кулуарында.
Оқи отырыңыз: Қазақстанда жұмыс берушілер қызметкерлерге 882 миллион теңге қарыз
Сонымен бірге 150–250 АЕК аралығындағы кредиттерге (шамамен 600 мың – 1 млн теңге) 8 сағаттық "салқындату кезеңі" енгізілді. Бұрын мұндай қарыздар бірнеше минутта мақұлданатын болса, енді банктер оны алаяқтық типологиясына сәйкестігін тексеру үшін кемінде 8 сағат күтуге тиіс.
Маманның айтуынша, бұл қадам азаматтарды қаржылық алаяқтардан қорғап, несие рәсімдеу қауіпсіздігін арттыруға бағытталған.
