Ақмола облысында резонанс тудырған қылмыстық іс бойынша тергеу аяқталды, деп хабарлайды өңірлік прокуратураға сілтеме жасаған KAZ.NUR.KZ.
Құзырлы органның мәліметінше, Ақмола облысының прокурорлары әлеуметтік тұрғыдан осал азаматтарды ұрлап, олардың атына ірі банктік несиелер рәсімдеумен айналысты деген ұйымдасқан қылмыстық топқа қатысты қылмыстық істі тергеуді аяқтаған.
"ҰҚТ құрамына еліміздің түрлі өңірлерінен 25 адам кірген. Олардың арасында бірқатар банктің қызметкерлері болған. Олардың қатысуымен 5 жылдан астам уақыт бойы алаяқтық әрекеттер жасалған.
Қылмыстардың құрбаны болғандар – республика бойынша 348 азамат. Келтірілген шығын көлемі 3,7 млрд теңгені құрады", — делінген хабарламада.
Прокуратураның дерегінше, тергеу барысында қылмыстық жолмен табылған мүліктер анықталған: Алматы қаласындағы пәтерлер мен жер телімдері, қымбат автокөліктер, ірі көлемдегі қолма-қол ақша. Тәркіленгеннің жалпы құны – 2,7 млрд теңге.
Топтың барлық қатысушысы ұсталып, уақытша ұстау изоляторына қамалған.
Қазіргі таңда қылмыстық іс процесс қатысушыларына танысуға берілген, түпкілікті шешімді сот шығарады.
Өзге ақпараттар ҚР ҚПК-нің 201-бабының 1-бөлігіне сәйкес жарияланбайды.
Мәтіннен қате тапсаңыз, бізге жазыңыз
