Атырауда бір айда 12 мыңнан астам бүлдіршін балабақшаға орналасты, деп хабарлайды 24kz.
Бұл – ел бойынша енгізіліп жатқан мектепке дейінгі ұйымдарды ваучерлік қаржыландыру пилоттық жобасы аясында жүзеге асты. Бүгінде облыс орталығындағы 171 мектепке дейінгі ұйым жаңа жүйемен жұмыс істейді. Шілде-тамыз айларында ата-аналарға барлығы 20 мыңнан астам ваучер беріліп, нәтижесінде балабақша кезегі 70%-ке азайған.
Жас ана Альбина Жолдасова 2 жастағы ұлы Әмірханды бөбекжайға оранастырғанына 15 күнде уақыт өтіпті. Әзірге сәби бейімдеу сатысынан өтуде. Альбина бұған дейін тұңғыш қызына балабақша кезегін 3 жыл күткенін айтады. Ваучерлік жүйенің басты артықшылығы кезек тез жылжиды. Сосын отбасы бюджетіне айтарлықтай көмегі бар. Мысалы, бір баланы тәрибелеуге кететін шығынның 56 мың теңгесін мемлекет көтереді. Ата-ана тек баланың тамағына яғни, жас ерекшелігіне қарай айына 14-17 мың теңге төлейді.
Альбина Жолдасова, қала тұрғыны:
- Мына ваучерлік қаржыландыру бізге өте жақсы болды. Өйткені өзіміздің еркімізде. Балабақшаларды таңдай аламыз. Және бұрын бір балабақшадан екіншісіне ауысу өте қиын болды. Қазір өте жақсы, ыңғайлы. Жас ата-аналар үшін өте ыңғайлы. Балабақшаға таңертең 8-де әкеліп, кешкісін 18.30 да алып кетеміз.
Балабақшадағы 17 топта 400 бүлдіршін тәрбиеленіп жатыр. Жаңа жүйе іске қосылғалы мұнда сәби саны да айтарлықтай артқан. Бөбекжай жанындағы «Әжелер мектебі», «Әкелер клубы» секілді қоғамдық ұйымдар арқылы әр ата-ана бала тәрбиесіне тікелей ат салысады. Сондай-ақ жас ұрпақты жан-жақты дамытуға бағытталған «Беске дейін үлгер», «Тілге бойлау» секілді республикалық жобалар енгізілген.
Гүлбаршын Қарабасова, балабақша директоры:
- Биылғы жаңа оқу жылына 175 баланы ваучерлік қаржыландыру жүйесімен қабылдадық. Оның ішінде 60 бала кіші топ, 2 жасқа дейінгілер. Бізде барлық педагогтар қамтылған. Топ жетекшілері, денешынықтыру маманы, қазақ тілі маманы, психолог жұмыс істейді.
Жаңа жүйе іске қосылғалы облыс орталығындағы балабақша кезегі айтарлықтай қысқарды. Тек өткен айдың өзінде бөбекжайларда 12 мыңнан астам жаңа орын пайда болды.
Зарина Мақсотқызы, қалалық білім бөлімінің сектор меңгерушісі:
- Шілде-тамыз айларында барлық ата-аналарға 20 мыңға жуық ваучер берілді. Бұл жобаның ата-аналар үшін бір мүмкіншілігі ваучер берілген ата-ана баласы балабақшаға бара тұра кезектілігі сақталады, яғни, қайтадан кезеке тұрудың қаежттілігі жоқ. Күту парағы деген бар күту парағына баласын тіркеу арқылы балабақшадан басқасына ауысуға мүмкіндік береді.
Жыл соңына дейін облыста қосымша 4200 жаңа орын ашу жоспарланған. Қазір 810 орындық 5 жаңа балабақшаның құрылысы жүріп жатыр. Қосымша жекеменшік ұйымдарға мемлекеттік тапсырыс көлемі артуда.
Авторлары: Арыстанбек Кенже, Айбек Байзақов, Жандос Рахметуллин
