Шанхай ынтымақтастық ұйымы Батыс та жіті қадағалап отыр. АҚШ-тағы тәуелсіз сарапшы Найджел Ли осылай дейді.
Вашингтонда қызмет істейтін сингапурлық маман мүше мемлекеттердің ұйымшылдығы арқасында тараптар лаңкестік, экстремизм мен сепаратизмге қарсы тиімді жұмыс жүйесін құра алғанын ерекше атап өтті.
«Ал биылғы саммитте кей алпауыт елдердің АҚШ орбитасынан алыстап, экономикалық гегемонияға қарсы күш біріктіруі мүмкін екендігі байқалды», — дейді сарапшы. Оның айтуынша, саммиттің қарқын алуына былтыр Қазақстанда өткен жиынның да үлесі зор.
Найджел Ли, тәуелсіз сарапшы:
- Шанхай ынтымақтастық ұйымын алғашында Батыс елдері елемей, сөз жүзіндегі өңірлік шекаралық бірлестік деп санайтын. Бірақ уақыт өте келе бұл түсінік өзгеріп, биыл Батыс елдері ұйым белсенділігін жіті бақылап отыр. Алып державаларды қамтитын осындай құрылымда тепе-теңдікті сақтау мен мәмілеге келе алу аса маңызды. Және оның сәтті жүзеге асуына былтырғы Қазақстанда өткен ШЫҰ саммиті зор үлес қосты, диалог жасайтын платформаның ықпалы артты.Қазір ШЫҰ елдері өз арамызда кім мықты деуді ысырып қойып, қайткенде бірге дами аламыз дегенді күн тәртібіне шығарып отыр. Бірауыздан қабылданған Тяньцзинь декларациясы соған дәлел.
