Л.Н. Гумилёв атындағы Еуразия ұлттық университетінің (Астана қаласы) PhD докторанты Гаухар Мамбеталина Вашингтон қаласында өткен беделді Халықаралық психологиялық ғылымдар қауымдастығының (APS) конференциясында әлеуметтік-психологиялық өзекті тақырыпта баяндама жасады.

Ол "Gender equality, developmental disabilities, and psychotraumatic experiences in Kazakhstan: A scoping review" ("Қазақстандағы гендерлік теңдік, ерекше қажеттіліктері бар балалар және психотравмалық тәжірибе: шолу") тақырыбында баяндама жасады.

Гаухар Мамбеталина Қазақстанда жарияланған 205 ғылыми мақаланы талдап, зерттеу жүргізді. Бұл мақалалар гендерлік теңдік пен отбасылық психология, ерекше қажеттіліктері бар балалардың ата-аналарының психоәлеуметтік қиындықтары, педагогтар мен қоғам тарапынан инклюзия мен ерекше қажеттіліктерді қабылдау мәселелерін қамтыды.

Зерттеу іріктемесіне қазақ, орыс және ағылшын тілдерінде жазылған, әлеуметтану, педагогика, психология және саясаттану салаларындағы мақалалар енгізілген.

Қазақстандағы Дағдарыс орталықтары одағының деректеріне сәйкес, 2019 жылы 2 миллионнан астам әйел зорлық-зомбылыққа ұшыраған. Карантин енгізілгеннен кейін көмек қызметтеріне жасалған қоңыраулар саны екі есеге артқан.

"Гендерлік теңдік пен инклюзивті білім берудің қолжетімділігі — бұл жай ғана статистика емес. Бұл күн сайын тосқауылдар мен психологиялық жарақаттарға тап болатын мыңдаған әйел мен аналардың шындығы", — деп атап өтті Гаухар.

Зерттеу доктор Жанат Аубакирова (ЕНУ), профессор Вианн Нгуен-Фенг (Миннесота университеті, АҚШ) секілді мамандармен бірлесе отырып жүргізілді.

Мамбеталинаның баяндамасы халықаралық ғылыми қауымдастықтың қызығушылығын тудырды, бұл посткеңестік елдерді гендер мен инклюзия мәселелерін жаһандық күн тәртібіне енгізудің маңыздылығын көрсетті.

Баяндаманың қорытындысында келесі негізгі бағыттар атап өтілді: отбасылық зорлық-зомбылық үшін жазаны қатайту; әкелердің бала тәрбиесіне қатысуын кеңейту; инклюзивті білім берудің сапасын арттыру; аналар мен ата-аналарды саясат пен денсаулық сақтау деңгейінде қолдау.

Мәтіннен қате тапсаңыз, бізге жазыңыз