Алматыда қоғамдық көлікті жаңарту және экологиялық жағдайды жақсарту жұмыстары жалғасып жатыр. Қалалық мобильділік басқармасы жаңа бағыт ашып, оны электроавтобустармен қамтамасыз етпек, деп хабарлайды Almaty_joly Telegram арнасына сілтеме жасаған KAZ.NUR.KZ.
№90 бағыттағы автобус Абай даңғылы бойымен – К.Медеубеков көшесінен Республика сарайына дейін қатынайды. Бұл жаңа бағыт Наурызбай ауданындағы Қалқаман және Шұғыла шағынаудандары тұрғындарының қатынасын жеңілдетеді.
Бағытта ұзындығы 12 метрлік Golden Dragon маркалы электроавтобустар қызмет көрсетеді. Олар дыбыссыз жүріп, салқындатқыштармен, бейнебақылау камераларымен, USB-ұяшықтарымен, жүргізушіні қадағалау жүйелерімен және өзге де заманауи құралдармен жабдықталған.
Жолаушыларды "Алматыэлектротранс" коммуналдық кәсіпорны тасымалдайды. Жаңа бағыт 2 қыркүйектен бастап жұмыс істейді.
Мәтіннен қате тапсаңыз, бізге жазыңыз
