АҚШ президенті Дональд Трамп Daily Caller басылымына берген сұхбатында өзі, Путин және Зеленский қатысатын үшжақты кездесу өтетініне сенімді екенін, бірақ Ресей мен Украина басшыларының жеке кездесуінің перспективасына күмәнмен қарайтынын айтты, — деп хабарлайды Massaget.kz тілшісі.
"Үшжақты кездесу болады. Ал екіжақты кездесу жайлы білмеймін. Бірақ үшжақты өтеді. Кейде адамдар оған дайын болмайды", – деді ол.
Трамп Путин мен Зеленскийді балаларға теңеді:
"Сіздің балаңыз алаңдағы басқа баланы жек көреді. Олар "тербеліп, тербеліп", тоқтамайды, ал сіз олардың тоқтағанын қалайсыз. Біраз уақыттан кейін олар тоқтағанына риза болады", – деді АҚШ президенті.
"Кейде оларды тоқтатпас бұрын аздап күресіп алуына тура келеді. Бірақ бұл ұзаққа созылып кетті", – деп қосты ол.
Трамп Украинадағы қақтығыстың аяқталғанын көргісі келетінін айтты.
Ол 15 тамызда Аляскадағы саммиттен кейін Путин мен Зеленскийдің кездесуін дайындауға кіріскенін мәлімдеді. Ресей СІМ басшысы Сергей Лавров Путиннің Зеленскиймен кездесуге дайын екенін, бірақ жоғары деңгейде талқылауды қажет ететін барлық мәселе алдын ала мұқият пысықталуға тиіс екенін айтқан.
Зеленский өз кезегінде Киевтің келіссөздерге дайын екенін, бірақ Трамп қатысатын үшжақты форматты жөн көретінін мәлімдеді.
28 тамызда Германия канцлері Фридрих Мерц Путин мен Зеленскийдің кездесуі болмайтынын айтты. Ақ үй де сол күні Украина мен Ресей президенттерінің соғысты аяқтауға дайын емес екенін хабарлаған.
Өзекті жаңалықтарды өз уақытында оқу үшін Facebook парақшамызға жазылыңыз!
