Алматыдағы №28 қалалық емханада өкпе қабынуына байланысты барған келіншекке аллергияға қарсы сынама жасалмастан дәрі егіліп, соның салдарынан науқас есінен танып, комаға түсті, деп хабарлайды Skifnews.kz ақпарат порталы.
Бұл оқиғаны тереңірек зерттеген журналист Руслан Өтепбай емхана басшылығынан және маусымның үшінен бері комада жатқан Толқын Әжібекованың жұбайынан сұхбат алды.
Толқынның күйеуінің айтуынша, жағдайы аса ауыр.
«15 минуттай жүрегі тоқтап қалды. Клиникалық өлім болды. Жай ғана система салдыруға барған. Сол кезде салынған уколға аллергия берді», – дейді ол.
Дәрігерлер науқасқа «Цеф-3» екпесін жасағанын айтқан. Алайда жәбірленушілердің сөзіне сенсек, ақ халаттылар бастапқыда «алдын ала сынама жасадық» деп хабарлаған. Кейін сараптама оның жалған екенін анықтап берді.
Емхана басшылығы бұл іске тікелей дәрігерлер жауапты екенін айтып, комментарий беруден бас тартты.
«Отбасының алаңдаушылығын түсінеміз. Арнайы сараптама жүргізілді, іс құзырлы органдарға тапсырылды. Бізге түсініктеме беруге рұқсат жоқ, себебі ол дәрігерлік құпияға жатады. Емхана қалыпты жұмысын жалғастыруда. Әжібекова Толқынға қажетті көмектің бәрі көрсетілуде. Күндізгі стационардың дәрігері анамнез жинап, ем тағайындап барып жүйе (система) қойған», – деді мекеменің бас директоры Назгүл Асанова.
Ал дәріні жазған дәрігер өз кезегінде науқастың ешқандай аллергиясы жоқ екенін айтқанын алға тартты.
«Алғашқы болжамды диагноз – “бронхит, өршу сатысы” болды. Соған сәйкес ем тағайындалды. Анамнез жинағанда науқас “ешқандай аллергиям жоқ” деді. Қандай дәрі тағайындап жатқанымды түсіндірдім, ақпараттық келісімге қол қойды», – деді ол.
