Желіде Алматы әуежайында жолаушылардың бірі әжетханада өзіне зиян келтірмек болғаны туралы ақпарат тарады. Оңтүстік астана әуежайының баспасөз қызметі оқиғаның мән-жайын айтты, деп хабарлайды KAZ.NUR.KZ.
Qumash Telegram-каналында оқиға орнына фотолар жарияланды. Суреттерден жерде жатқан бөтелкенің бір бөлігі мен еденде қан іздерін байқауға болады.
"Алматылық әуежайда тағы да оқыс оқиға орын алды. Жолаушы әжетханаға кіріп, тамағын пышақпен кеспек болған көрінеді", — делінген материалда.
NUR.KZ тілшісі төтенше жағдайдың мән-жайын Алматы әуежайының баспасөз қызметінен анықтап білді. Олардың хабарлауынша, жолаушы Т1 ішкі рейстер терминалының әжетханасында өзіне физикалық тұрғыда зиын келтірмек болған.
"Әуежай қызметкерлері оқиғаны уақытылы байқап, бірден медициналық қызметті шақыртты. Жедел жәрдем келгенше жолаушыға алғашқы медициналық көмек көрсетілді. Қазіргі уақытта оның өміріне ешқандай қауіп төніп тұрған жоқ. Ол дәрігерлердің бақылауында. Әуежайдың жұмысы штаттық режимде жалғасып жатыр", — делінген ресми хабарламада.
Айта кетейік, бұған дейін 25 тамызда Алматы әуежайында тағы бір оқыс оқиға орын алды. Жолаушылардың бірі кассаның алдында өзін өртеп жібермек болды.
Мәтіннен қате тапсаңыз, бізге жазыңыз
