Сот осындай шешімге келді.
Сеул соты бұрынғы Оңтүстік Корея президенті Юн Сок Ёльдің әйелі Ким Кон Хиді қамауға алу туралы шешім шығарды, деп хабарлайды inbusiness.kz сайты BBC-ге сілтеме жасап.
Бұған дейін Юн Сок Ёль елде әскери төтенше жағдай енгізбек болғаны үшін биліктен кеткен болатын.
52 жастағы Ким Кон Хи кінәсін мойындаған жоқ. Сот төрт сағатқа созылған тыңдаудан кейін оны қамауға алу туралы шешімге келді. Кәсіпкер Ким Кон Хи BMW автокөліктерін Оңтүстік Кореяда сатумен айналысатын Deutsch Motors компаниясының акцияларымен алаяқтық жасап, 800 миллион воннан астам заңсыз пайда тапты деп айыпталуда.
Бұдан бөлек ол Chanel-дің екі сөмкесі мен гауһар тас алқасын пара алған және 2022 жылғы қосымша парламент сайлауына, сондай-ақ былтырғы кезекті сайлауға кандидаттарды іріктеу процесіне заңсыз араласқан деп айыпталып отыр.
Негізінен Ким Кон Хиге қатысты акциялармен байланысты алаяқтықа барды деген күдік бұрын да айтылды. Бірақ оның күйеуі президент кезінде оппозицияның арнайы прокурор тағайындау туралы ұсынысын үш рет вето арқылы тоқтатқан.
Оңтүстік Корея тарихында алғаш рет бұрынғы президент пен бұрынғы бірінші ханым бір уақытта қамауға алынып отыр. Бұған дейін елде тек президенттер ғана биліктен кетіп, қамауға алу, сотталу секілді жағдайлар тіркелген.
