Кремль бұл ақпаратты әлі растаған жоқ.
Мәскеу Украина бақылауында қалған Донбастың бөлігін алса, Херсон және Запорожье облыстарындағы майдан шебінде тоқтауға дайын. Бұл туралы Түркияның сыртқы істер министрі Хакан Фидан айтты, деп хабарлайды inbusiness.kz сайты DW-ге сілтеме жасап.
Ыстанбұлда Ресей мен Украина арасындағы келіссөздерге араағайындық жасаған Түркияның сыртқы істер министрі Хакан Фидан Ресейдің соғысты тоқтату үшін Украина жерін бөлісу жөнінде ұсынған ымырасы туралы пікір білдірді. Ол Haberler басылымына сұхбат берді.
"Қазір Ресейге Донецк облысының қалған 25-30 пайызын беру және Запорожье мен Херсон облыстарын қазіргі майдан шебінде қалдыру жөнінде алдын ала келісім бар", – деді Түркия министрі.
Оның сөзінше, бұған дейін Ресей Украинадан осы төрт облыстың әкімшілік шекараларындағы толық аумақты беруді талап еткен.
Ресей тарапынан бұл ақпаратқа қатысты ресми ақпарат болмады.
Соғысты зерттеу институтының (ISW) мәліметінше, Ресей әскері Луганск облысының 99 пайызын, Донецк, Запорожье және Херсон облыстарының шамамен 70 пайызын басып алған.
Айта кету керек, бұған дейін Германия канцлері Путин пен Зеленский кездесетініне күмәнмен қарайтынын жазған едік.
