Оңтүстік Кореяның бұрынғы президенті Юн Сок Ёльдің жары Ким Кён Хиге жемқорлық және пара алу бойынша айып тағылды, — деп хабарлайды Massaget.kz тілшісі Yonhap агенттігіне сілтеме жасап.
Ол сот алдында жауап беріп, қамауға алынған тұңғыш экс-президенттің жұбайы болды.
Күйеуі Юн Сок Ёль де әскери төтенше жағдай енгізуге талпыныс жасады деген айыппен қамауда отыр. Биыл сәуір айында оған импичмент жарияланып, қызметінен шеттетілген болатын. Арнайы прокурор Мин Джун Кидің айыптауы бойынша, Ким Кён Хи капитал нарығы туралы заңды, саяси қорлар туралы заңды бұзған және делдалдық үшін пара алған.
Оған 2009–2012 жылдары акциялармен манипуляция жасау схемасын қаржыландырды деген, сондай-ақ 2022 жылғы президенттік сайлау алдында күйеуімен бірге "ықпалды брокерден" тегін әлеуметтанулық сауалнамалар алды деген айып тағылып отыр. Тергеушілердің мәлімдеуінше, бұл қызметке алғыс ретінде ол бұрынғы депутат Ким Ён Сунның кезектен тыс парламент сайлауына түсуіне көмектескен.
Бұдан бөлек, Кимді 2022 жылы Бірігу шіркеуі арқылы балгерден іскерлік қызметтердің орнына қымбат сыйлықтар алды деген күдікке ілінді.
Айып оның алдын ала қамау мерзімі аяқталуына екі күн қалғанда тағылғандықтан, ол тағы алты айға дейін қамауда қала алады. Қажет болған жағдайда жаңа айыптар тағылса, бұл мерзім ұзартылуы мүмкін.
Қамауға алынғаннан бері Ким бес рет жеке тергелген, бірақ көбіне өзін-өзі әшкерелеуден бас тарту құқығын пайдаланған. Тергеу жалғасуда, оның ішінде Кимге қызметтік тағайындаулар немесе іскерлік көмектер үшін зергерлік бұйымдар бергені күдіктелген адамдардың үйлерінде тінту жүргізілген.
Еске салсақ, қазіргі таңда Оңтүстік Корея президенті – 2024 жылдың 3 маусымында кезектен тыс сайлауда сайланған Ли Чжэ Мён. Оның инаугурациясына дейін ел премьер-министрі Хан Док Су уақытша президент міндетін атқарған еді. Кейін ол отставкаға кеткен, ал жаңа премьер-министр болып Ким Мин Сок тағайындалды.
Аптаның басты оқиғалары мен пайдалы видеоларды көру үшін YouTube арнамызға жазылыңыз
