Қытайды АҚШ және Ресей арасындағы ядролық қарусыздану жөніндегі келіссөздерге шақыру қисынсыз әрі шындыққа жанаспайды.
Бұл туралы Қытай Сыртқы істер министрлігінің ресми өкілі Го Цзякунь мәлімдеді, деп хабарлайды Синьхуа агенттігі.
Ол АҚШ Президенті Дональд Трамптың "Қытай келіссөздер процесіне қосылады" деген үмітіне қатысты пікір білдірді.
– Қытайдың ядролық әлеуеті АҚШ-пен салыстыруға келмейді. Екі елдің ядролық саясаты мен стратегиялық қауіпсіздік жағдайы да мүлдем бөлек, – деді Го Цзякунь.
Оның айтуынша, ең ірі ядролық арсеналға ие мемлекеттер – АҚШ пен Ресей – өздерінің ерекше міндеттемелерін адал орындап, қаруларын айтарлықтай қысқартуы тиіс. Бұл – толыққанды қарусыздану үшін негізгі шарт.
Қытай болса "ядролық қаруды бірінші болып қолданбау" саясатын ұстанып, өз күшін тек ұлттық қауіпсіздік үшін қажетті ең төменгі деңгейде ұстап отырғанын атап өтті. Дипломат Бейжіңнің ешқашан қарулану жарысына бармайтынын айтты.
Сондай-ақ, Қытайдың ядролық саясатын әлемдік бейбітшілікке қосылған үлес деп бағалады.
Ал Стокгольм халықаралық бейбітшілікті зерттеу институтының (SIPRI) деректеріне сүйенсек, қазіргі таңда әлемдегі барлық ядролық қарудың шамамен 90%-ы Ресей (5459 оқтұмсық) мен АҚШ-тың (5177 оқтұмсық) қолында. Қытайда шамамен 600 ядролық оқтұмсық бар, әрі ол соңғы жылдары арсеналын ең жылдам ұлғайтып отырған мемлекет саналады.
