Мәжіліс депутаты Нартай Сәрсенғалиев садақ ату федерациясының президенті болып тағайындалды, деп хабарлайды Skifnews.kz ақпарат порталы федерацияның Instagram желісіндегі парақшасына сілтеме жасап.
"Sadaq aty" республикалық дәстүрлі садақ ату федерациясына жаңа президент тағайындалды.
Ол 2023 жылдан бастап федерация президенті лауазымын атқарған Мұқатаев Айдос Зиядұлының қызметтен кетуіне байланысты осы қызметке келді.
Айта кетейік, Нартай Сәрсенғалиев парламент мәжілісінің Әлеуметтік-мәдени даму комитетінің мүшесі. 2021 жылы "Шапағат" медалімен марапатталды.
БАҚ саласында Қазақстан Республикасының президенті грантының иегері, ХХІ халықаралық "Шабыт" фестивалінің гран-при иегері, "Тұмар" сыйлығының 2 мәрте иегері.
"Нартай Аралбайұлы, спорт федерациясының президенті лауазымына тағайындалуыңызбен шынайы ықыласпен құттықтаймыз! Сіздің бұл мәртебелі қызметке келуіңіз – еліміздегі спорт саласының жүйелі дамуына, халықаралық стандарттарға сай ілгерілеуіне тың серпін беретініне нық сенім білдіреміз. Қоғам игілігі жолындағы бұл аса жауапты миссияңызда қажымас қайрат, салиқалы шешімдер, биік жетістіктер мен толымды табыс тілейміз. Еліміздің спорт саласының дамуына қосар үлесіңіз баянды болып, абырой-беделіңіз әрдайым биіктей берсін", — делінген федерация хабарламасында.
