Цифрлық даму, инновациялар және аэроғарыш өнеркәсібі министрі Жаслан Мәдиев алаяқтардың 1414 қысқа нөмірінен хабарлама таратып, азаматтарды алдап жүргенін растады.
Министрдің айтуынша, бастысы – цифрлық гигиенаны сақтау:
«Еgov немесе банк қызметкерлері ешқашан SMS арқылы жіберілген кодты сұрамайды. Мұндай жағдайда адамдар сақ болуы тиіс», – деді ол.
Сонымен бірге Мәдиев киберқауіпсіздік бойынша курстар мен тренингтердің бар екенін атап өтіп, халықтың кибергигиена деңгейін арттыру қажеттігін айтты. Министрліктің мәліметінше, қауіпсіздікті күшейту бағытында да жүйелі жұмыстар жүргізіліп жатыр.
