Шымкентте оқуға түсе алмай қалған талапкерлерге қосымша 285 грант берілді. Осымен екінші жыл қатарынан жергілікті бюджет есебінен грант бөлінген, деп хабарлайды 24KZ телеарнасына сілтеме жасаған KAZ.NUR.KZ.
Телеарнаның мәліметінше, іріктеу кезінде әлеуметтік аз қамтылған отбасы балалары мен мүгедектігі бар түлектерге басымдық берілген. Студенттерге шәкіртақы төленіп, жатақханамен қамтылады.
Президенттің жоғары білімді қолжетімді ету туралы тапсырмасы мен "жұмысшы мамандықтары жылына" орай қажетті кадрлар тізімі жасақталған. Осылайша инженерлік-техникалық, өңдеу және құрылыс салаларына грант көп бөлінген.
Сондай-ақ ақпараттық-коммуникация мен ауыл шаруашылығы мамандықтарына басымдық берілген.
Басты шарт – оқуын тәмәмдаған жас маман өңірдің дамуына үлес қосуы керек.
"Комиссия осыған дейін барлығын талқылау үшін 4 рет жиналды. Егжей-тегжейлі талқылады. Қай мамандықтар керек екенін сала мамандарын шақырта отырып, мәніне, мағынасына, байыбына бара отырып бекіткенін айтқымыз келеді", — деді Сәрсен Құранбек.
Мәтіннен қате тапсаңыз, бізге жазыңыз
