Тұтқындарды босату үш күнге созылды.
Ресей мен Украина 16 мамырда Ыстанбұлда өткен келіссөздер нәтижесі бойынша өзара мың тұтқынды босатты, деп хабарлайды inbusiness.kz сайты DW-ге сілтеме жасап.
Тиісті ақпаратты ресейлік және украиналық дереккөздер растады.
"Қазіргі таңда ресейлік әскери қызметшілер Беларусь аумағында орналасты, оларға қажетті психологиялық және медициналық көмек көрсетіліп жатыр", – деп хабарлады Ресей Қорғаныс министрлігі Telegram-да.
Ресейлік тараптың мәліметінше, алдағы уақытта алмасудың жаңа кезеңдері жоспарланбаған.
"16 мамырда Ыстанбұлда қол жеткізілген Ресей-Украина келісімдеріне сәйкес, 23-25 мамыр аралығында 1000 адамға 1000 адам формуласы бойынша тұтқындар алмасуы жүргізілді", – деп жазылған мәлімдемеде.
25 мамыр күні таңертең Украина президенті тұтқындардың алмасуына қатысты ақпарат таратты.
"303 украиндық үйіне оралды. Түркияда келісілген 1000-ға 1000 форматы бойынша тұтқын алмасудың үшінші кезеңі аяқталды", — деп жазды Владимир Зеленский Telegram арнасында.
Белгілі болғандай, Украина Қарулы Күштер, Ұлттық гвардия, Мемлекеттік шекара қызметі мен Мемлекеттік арнайы көлік қызметінің қызметкерлерін қайтарған.
Айта кететіні, 16 мамыр күні украиндық және ресейлік делегациялар Түркияда кездесіп, 2022 жылдан бері алғаш рет тікелей келіссөздер жүргізді.
