« Ақтау теңіз порты» арнайы экономикалық аймағына 6 айда 10,2 млрд теңге инвестиция тартылды.

Осы уақыт аралығында 34,5 млрд теңгенің өнімі өндіріліп, қызметі көрсетілген. Мемлекетке 3,2 млрд теңге салық түскен. Өңірде жыл басынан бері 10 ірі инвестициялық жоба жүзеге асқан.

Мемлекет басшысы былтырғы Жолдауында үкіметке экспортты дамыту және отандық тауар өндірушілерді қолдау туралы тапсырма берген болатын. Бұл тұрғыда «Ақтау теңіз порты» арнайы экономикалық аймағы маңызды роль атқарады. Мұнда қазір теңіз арқылы жүк тасымалын үш есе арттыру мақсатында ірі контейнерлік хаб салынып жатыр.

Қайрат Қалиолла, Ақтау халықаралық контейнерлік хабы бас директорының орынбасары:

- 19 га жер аумағында құрылып жатыр. Бұл контейнерлік хаб Каспий маңы елдері мен Орталық Азия елдерінің тұрақты контейнерлік сервистік парк ұйымдастыруды мақсат етеді. Бұл жоба екі кезеңнен тұрады. Бірінші кезеңнің аяқталу жұмыстары осы жылдың аяғына мақсатталып отыр.

Сонымен қатар хаб аумағында контейнерлерді өлшеу, сертификаттау, жөндеу және сақтау сияқты қосымша қызметтер ұсынылады. Жоба толық аяқталған соң кешеннің жылдық өткізу қабілеті 240 мың жиынтық факторлық өнімділікке жетеді. Бүгінде «Ақтау теңіз порты» арнайы экономикалық аймағының аумағы екі жарым есе ұлғайды. Ол құрылғалы бері экспорт көлемі – 4 млрд теңгеге жеткен. Тек осы жылдың 7 айында мұнда 8 жаңа инвестициялық жоба жүзеге асты.

Кирилл Демченко, кәсіпорын басшысы:

- Біздің заводымыз қап өндірумен айналысып жатыр. Қазіргі таңда біздің өніміміз химиялық немесе құрылыс саласында пайдаланылып жатыр. Біздің жыл сайынғы мощностіміз 6 миллион продукцияға дейін болып жатыр. Біздің ішімізде 100-ден астам жұмысшы еңбек атқарып жатыр. Біздің өніміміз еліміздегі әр облыстарға беріледі.

Жаңа жобалардың жүзеге асуы арқылы арнайы экономикалық аймақта мыңға тарта жұмыс орны ашылды. Онда қазір отандық кәсіпкерлерден өзге Италия, Түркия, Германия, Әзербайжан, Қытай және Сингапур компаниялары өндіріс ашып, жобаларын сәтті жүзеге асыруда. Арнайы экономикалық аймақ жұмыс істей бастағалы жалпы инвестициялар көлемі 347,2 млрд теңгеге жетті. Соның тең жартысы шетелдік инвестициялар.

Ардақ Айбарұлы, Аманжол Жөңкешов